Qırımda «Hizb ut-Tahrir işi» figurantı Uzair Abdullayevniñ ömür arqadaşı Fera Abdullayevağa dair memuriy tertip bozuluvınıñ baqılması boyunca oturışuv başqa künge avuştırıldı. Qırım.Aqiqat muhbiriniñ bildirgenine köre, oturışuv fevralniñ 6-sına keçirildi.
Oturışuv, aq-uquq qorçalayıcısı Lilâ Gemeci tarafından muracaat bildirilgeni içün keçirildi. O, Qırım Yuqarı mahkemesinden Fera Abdullayevanıñ özüni tınç tutqanını ve tertipni bozmağanını qayd etken videonı talap etti.
2017 senesi dekabrniñ 8-nde «Hizb ut-Tahrir işi» boyunca nevbetteki oturışuv esnasında Abdullayeva Qırım Yuqarı mahkemesi binasında ekinci qatnıñ meydançığında tura edi. Mahkeme icracıları, oturışuv qapalı rejimde keçkenine sıltap, qadınnı mahkeme koridorına yibermediler. Daa soñra mahkeme icracıları Abdullayevadan mahkemeniñ birinci qatına enmesini talap ettiler. O, itiraz etmege başlağanda, onı yaqaladı ve memuriy protokol tizmek içün alıp kettiler.
«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, taqip etilüvlerniñ diniy alâmetke köre yapılğanlarını tüşüneler. Advokat Emil Kurbedinov, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen beraber İslâm dinini kütken ukrainler, ruslar, tacikler, azerbaycanlar ve diger etnik gruplarğa ait Qırım sakinleri olğanını qayd ete.
Halqara siyasiy İslâm teşkilâtı «Hizb ut-Tahrir»niñ vekilleri öz vazifesini, bütün musulman devletlerini bir İslam hilâfeti içinde birleştirüvde köreler. Lâkin olar buña irişmek içün terroristik usullarınıñ qullanıluvını red ete ve Rusiyede aqsız yerde taqip etilgenlerini aytalar. Rusiyeniñ Yuqarı mahkemesi 2003 senesinde «Hizb ut-Tahrir»ni «terroristik» olaraq tanılğan 15 birleşmeniñ cedveline kirsetip, yasaq etti.
