Qırımlı faallerniñ bir gruppası mahküm etilgen ukrain faali Volodımır Baluhnıñ ailesi içün maddiy yardım toplay. Facebookta para toplanacağınen bağlı ilân berilgeninen sayuvlı saatlar içinde yarımadada ve Ukrainanıñ qıta qısmında yaşağan insanlar seslendi, dep ikâye ete Qırım.Aqiqatqa aqça toplamaqnıñ teşebbüsçisi olğan Yelena Antonova.
«Biz keçken afta soñunda Volodyanıñ evine bardıq, o aileniñ yaşayışını kördik ve yardımğa muhtac olğanlarını añladıq. Paralarnıñ bir qısmınen cöremeni tölep, digerini – anasına yollaycaq olamız. Evinde soba yaqıla, belki odun kerek olur, çünki qadın yañğız qalacaq. Onıñ ailesi para istemedi, bu bizim teşebbüsimiz, biz böyle şey körmegen edik, yardımsız qaldırmaq olmaz, er zaman yardım etken edik», – dedi teşebbüsçi.
Kremlniñ nezaretindeki Aqşeyh rayon mahkemesi yanvarniñ 16-nda, patron saqlağanında qabaatlanğan ukrain faili Volodımır Baluhnı üç yıl ve yedi ayğa yaşav tarzı koloniyağa yollamağa ve 10 biñ rublelik cöreme tölemeknen (tahminen 4,6 biñ grivna – QA) cezalamağa qarar berdi.
Bundan evel rus prokurorı, mabüsnı 5 yıl ve 1 ayğa azatlıqtan marum etip, yaşav tarzı koloniyağa yollamağa ve 20 biñ rublelik (tahminen 9,2 biñ grivna – QA) cöreme ödemesinen cezalanmasını talap etken edi.
FSB Volodımır Baluhnı 2016 senesi dekabrniñ 8-nde tutıp alğan edi. FSB hadimleri Volodımır Baluh yaşağan evniñ çardağında 90 dane patron ve bir-qaç TNT blokları tapılğanını beyan etken edi.
Baluhnıñ imayesi, o ukrain tarafdarı olğanı sebebinden – divarındaki yazı ve azbarında Ukraina bayrağı asılğanı içün – basqılarğa oğratılğanını tasdiqlay.
