Ukraina tış işleri nazirligi Rusiyede yasaq etilgen «Hizb ut-Tahrir» teşkilâtında iştirak etkeninde qabaatlanğan ukrainalı Muslim Aliyev, Emir-Usein Kuku, Vadim Siruk, Enver Bekirov, Refat Alimov, Arsen Cepparovnıñ Qırımdan Rusiyege keçirilgenine qarşı narazılıq bildire.
Bu aqta Ukraina tış siyaset nazirliginiñ saifesinde söz yürsetilmekte.
«Halqara gumanitar uquq normalar mücibi, tecavuzcı-devlet ilhaq etken topraq vatandaşlarını tecavuz etken devlet sıñırları içine zorbalıqnen köçürmesi yasaq. Tecavuzcı-devletniñ böyle qanunsız areketler yapması, onıñ halqara cevapkârlıqqa celp etilmesini talap ete», – denilmekte haberde.
Ukraina tış işleri nazirligi Rusiye tarafından ilhaq etilgen Qırımdan Ukraina vatandaşlarını öz toprağına keçirmekni toqtatıp, olarnı Ukraina topraqlarına qaytarılmasını talap ete.
Yaltalı «Hizb ut-Tahrir işiniñ» (Rusiye ve ilhaq etilgen Qırımda yasaqlanğan teşkilât) figuranları Arsen Cepparov ve Refat Alimov 2016 senesi aprelniñ 18-nde Qızıltaşta tevqif etilgenden berli apiste yatalar. İlk dört Yaltalı «Hizb ut-Tahrir işiniñ» mabüsi 2016 senesi fevralniñ 11-nde tutulğan edi. Olardan arasında insan aqları kontakt gruppasınıñ azası Emir-Üsein Kuku, qurucı olaraq çalışqan aluştalı Muslim Aliyev ve Qızıltaş köyüniñ sakini Enver Bekirov, em de Yaltalı çeçek satıcısı Vadim Sirük bar.
2017 senesiniñ soñunda «Yaltalı altı kişi» işiniñ taqiqatı bitkeni aqqında belli olğan edi. Tevqif etilgen qırımlılar Rostov-na-Donu şeerine yollanıldı. Şimaliy-Kavkaz okrug mahkemesi mahkeme otırışuvlarını qapalı şekilde keçire.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kürbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
