Rusiye, assambleya kün tertibine milliy eyyetlerniñ ayırım yapuv aqlarını imaye etüvnen alâqalı tüzetmeler kirsetilmegeni sebebinden, Avropa Şurası Parlament Assambleyasınıñ yanvar ayında keçecek sessiyasına öz eyyetini yollamaycaq, dep ayttı TASS agertligine Devlet Dumasınıñ vitse-spikeri Pötr Tolstoy.
«Rusiye, Avropa Şurası Parlament Assambleyasınıñ yanvar ayında keçecek sessiyasına öz eyyetini yollamaycaq, çünki bizim anda çalışmamıznıñ esas şartı, bu teşkilâtnıñ kün tertibine milliy eyyetlerniñ ayırım yapuv aqlarınıñ ezilmeyüvinen alâqalı tüzetmeler kirsetilmegeninen bağlıdır», – dep bildire agentlik Tolstoynıñ sözlerini.
O, Rusiye kelecekte de PASEnen bu meselede konsultatsiyalar keçirecegini de ayttı, dep yaza informagentlik.
Assambleyanıñ qış sessiyası yanvarniñ 22-26 arasında Frenkistannıñ Strasburg şeerinde ötkerilecek.
Rusiye Qırımnı ilhaq etkeni neticesinde, onıñ PASEdeki eyyetine nisbeten sıñırlavlar kirsetilgen soñ (eyyet rey berüv aqqından ve azalarınıñ assambleyanıñ esas organlarınıñ işinde iştirak etüvden marum etildi), özü assambleyanıñ işinde iştirak etmekten vaggeçip, 2017 senesiniñ yazında Avropa Şurasına azalıq bedelini ödemekni toqtatqan edi. Moskva PASEden kelecekte oña qarşı böyle sanktsiyalar kirsetilmemesi içün, reglamentiniñ deñiştirilmesini istey.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
