Link açıqlığı

Saatnıñ esas haberi

Bu yıl başından berli Qırım memuriy sıñırından biometrik nezaretten 27 Rusiye vatandaşı keçti – Ukraina Devlet sıñır hızmeti


Nümünelik fotosuret

2018 senesiniñ başından berli Qırım memuriy sıñırında biometrik nezaretten Rusiyeniñ 27 vatandaşı keçken. Bu aqta Qırım.Aqiqatqa Ukraina Devlet sıñır hızmeti Herson sıñır bölügi reberiniñ muavini İvan Şevtsov ikâye etip berdi.

O, bergen malümatqa köre, yanvarniñ 9-na qadar biometrik nezaretten «Kalançak» kiriş-çıqış noqtasından 19, «Çaplınkadan» - 3 ve «Çonğardan» -5 vatandaş keçken.

Şevtsovnıñ sözlerine köre, olar Qırımğa migratsion hızmetinden daa evel alğan hususiy izinler vastasınen kirgen, biometrik nezaretni ise, yarımadadan Ukrainanıñ qıta qısmına ketken vaqıtta keçkenler.

Ukraina Devlet sıñır hızmeti, memuriy sıñırnı kesip keçmege istegen çetel vatandaşlarınen vatandaşlığı olmağan şahıslar, migratsion hızmet organlarından hususiy izin almaq kerek olğanlarını hatırlatıp keçti.

Daa evel, 2018 senesiniñ başından berli Ukrainağa kirgen 15 biñden ziyade Rusiye vatandaşı biometrik nezaretten keçti, dep bilidirilden edi.

Devlet sıñırında yerleşken keçiş noqtalarında biometrik qayd sisteması yanvarniñ 1-nden itibaren çalışıp başlağan edi; bundan evel bir qaç kün devamında, hususan dekabrniñ 27-nden itibaren, bu sistema test rejiminde çalışqtı. Sıñırda çalışqan nezaretniñ yañı sisteması «migratsion telüke» cedvelindeki cemi 70 devlet vatandaşı, şu cumleden Rusiyenen alâğalı.

Qırım ilhaq etilgen soñ Ukraina ile yarımada arasında memuriy, aslında tam manada kerçek bir «sıñır» keçti. Memuriy sıñırda «Kalançak», «Çaplınka» ve «Çonğar» olaraq üç kiriş-çıqış noqtası çalışmaqta.

XS
SM
MD
LG