Kreml nezareti altında bulunğan Aqmecsit rayon mahkemesi yanvarniñ 11-nde qırımtatarlar ve musulmanlarnıñ evinde yapılğan tintüv ve tevqiflerge qarşı bir kişilik piket iştirakçisi Rustem Usmanovnı para cöremesimn tayin etti. Bu aqta Qırım.Aqiqatqa «Qırım birdemliginiñ» faali Server Mustafayev ikâye etip berdi.
Mahkeme Usmanovqa 10 000 ruble (4400 grivna civarında –QA) para cöremesi şeklinde ceza tayin etti.
Mustafayev material ögrenilgeninde bir çoq protsesual yañlışlar yapılğanı aqqında ikâye etti.
«Meselâ, piketçi tutulğan vaqıtta plakatqa yazılğan metinnen, dava materiallarında aks etilgen metin biri-birinden bütünley farqlı. Protokol noyabrniñ 27-nde tizilgen, protokol tizilecegine dair celphameni ise o dekabrniñ 7-nde teslim alğan. Yani ilk-evelâ protokol tizilgen, ondan soñ celpname azırlanğan. Bölük memurinıñ hatasını açıq aydın köstergen faktlar olsa da, mahkemeci buña köz yumdı», – dep qayd ete Mustafayev.
Oktâbrniñ 14-nde Rusiye tarafından ilhaq etilgen yarımadada küç idareleriniñ qırımtatarlar ve musulmanlarğa qarşı yapqan repressiyalarına narazılıq bildirmek maqsadınen bir kişilik piketler ötkerilgen edi. Keççe rusiyeli mahkemeciler işbu piketlerniñ iştirakçilerine para cöremesi şeklinde ceza tayin etken edi.
Piket iştirakçilerine nisbeten piket keçirüv tertibini bozğanları içün (Rusiye Uquq bozuv Memuriy Kodeksiniñ 20.2 madddesiniñ 5 qısmı) memuriy protokollar tizilgen edi.
Ondan soñ mahkeme oturışuvları hususan Aqmescit, Canköy, Aluşta, Sudaq, ayrıca İçki, İslâm-Terek, Qarasuvbazar ve Qurman rayonınlarında da keçken edi. Qabatlağan tarafnıñ esas isbatı Qırım MVDsi ekspert merkeziniñ «piketler bir maqsat, fikirnen birleştirilgen ve umumiy teşkil etildi» degen ekspertizasına bazanğan edi.
Qırım işğalinden soñ yarımadada mustaqil jurnalistler, cemaat ve qırımtatar milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
