Rusiye prezidenti Vladimir Putin rusiyeli mektep talebelerine Qırım tarihını ögrenmege tevsiye etti, dep haber ete yanvarniñ 11-nde rusiyeli TASS informagentligi.
Putinniñ sözlerine köre, Qırımnıñ tarıhı «pek mürekkep ve pek meraqlı».
«Şimdilik bizler onıñ taqdirinden pek haberdar degilmiz, Qırım ve Rusiyeniñ diger regionlarınıñ sakinleri Qırımnıñ taqdirine tanışsalar, pek meraqlı olur edi», – dedi o «Kelecekke ıntılğan Rusiye» mevzusına bağışlanğan inşalarnıñ muellefi olğan mektep talebelerinen yapqan körüşüvinde.
«Andan kimler kelip keçmegen: cenevizler de olğan, islâm halqları da olğan, yeudiy temsilcileri de qısmen bu territoriyağa kirip keçken», – dep bilidire Vladimir Putinniñ sözlerini rusiyeli neşir.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
