Link açıqlığı

Gemeci: Qırımda cinayetçilikniñ artuvı siyasiy taqiplernen bağlı


İlhaq etilgen Qırımda cinayetçilik seviyesi qarardan ziyade yükselgeni qısmen siyasiy taqiplernen alâqalıdır, dep saya qırımlı uquqçı Lilâ Gemeci. Böyle bir fikirni o Qırım.Aqiqat Radiosınıñ efirinde bildirdi.

«Men bellesem, cinayetçilik seviyesi qarardan ziyade yükselgeni birinci nevbette qırımtatar ve musulmanlarnıñ siyasiy taqiplerinen alâqalıdır. Bundan ğayrı ekstremizm maddeleri ağır soyları dep sayıla. Ondan da ğayrı, Rusiye ve Donbassnıñ tanılmağan «cumhuiyetlerinden» kriminal keçmişi olğan pek çok insan kelip başladı. Üçünciden, rusiyeli küç idaresi hadimleriniñ tespitnen bağlı planları bar, bu sebepten Ukraina devrinden qalğan pek çok davalarnı açıp, olarnı ğayrıdan taqiq eteler. Onıñ içün statistikanıñ bir qısmı qoşılıp yazılğan olması mümkün», – dep qayd etti uquqçı.

Rusiye Baş prokuraturasınıñ 2017 senesi yanvar-noyabr aylarında azırlağan esabatında, 2016 senesiniñ aynı müddetine nazaran ilhaq etilgen Qırımda cinayetçilik seviyesi 56% artqanı kösterilgen. Bu müddet içinde prokuratura yarımadada 35 biñ cinayet işlengenini qayd etken, olarnıñ 15 biñi – ağır ve ziyade ağır cinayetlerdir.

Baş prokuratura cinayetlerniñ eñ çoq tarqalğan soyu – dolandırıcılıq olğanını qayd ete. Böyleliknen ilhaq etilgen Qırım, Rusiyeniñ diger regionlarınen qıyaslanğanda cinayetçilik seviyesinde lider olıp çıqa.

Rusiye işğalinden soñ, Qırımda mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.

XS
SM
MD
LG