Ukraina BMT (OON) Baş Assambleyasına ilhaq etilgen Qırım boyunca yañı rezolütsiyalar berecek ve BMT (OON) monitoring missiyasınıñ yarımadağa kirsetilmesinen bağlı ruhset alınuvında ilerileme olacağına ümit ete. Bu aqta Ukrainanıñ BMT (OON) daimiy temsilcisi Vladimir Yelçenko «Avropa aqiqatı»na bergen intervyusında beyan etti.
«Bilgeniñiz kibi, biz keçken yılğa nazaran azırlanğan metinge (BMT (OON) Baş Assambleyası 2017 senesi dekabrniñ 19-nda Qırım boyunca qabul etken rezolütsiyası -QA) bayağı bir deñişmeler kirsettik. Böyle rezolütsiyalarnıñ öz tekamüli bar: bir yıl keçken soñ, vaziyet deñişe ve yañı metin qabul etile. Lâkin bizler epbir kelecek yıl BMT (OON) monitoring missiyasınıñ yarımadağa kirsetilecegine dair, iç olmağanda ufaq bir ilerileme olur, dep ümit etemiz», – dep qayd etti Yelçenko.
O, qayd etkenine köre, İnternette Kreml nezaretindeki Qırım parlamenti, «anda er şey yahşı olğanını» körmeleri içün BMTni (OON) Qırımğa davet etmek maqsadınen muracaat azılğanı aqqında malümat körgen eken.
«Biz özümiz de buña pek quvanır edik! Eger böyle bir davetname azırlanıp, monitoring içün anda barılcaq olsa, biz tek qol tutarmız! Eninde-soñunda maruzada ne yazacağımıznı bilirmiz, çünki şimdilik bizler Rusiye anda kimseni kirsetmegeni aqqında yazamız», – dey Ukrainanıñ BMTdeki (OON) daimiy temsilcisi Vladimir Yelçenko.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep ilân etti.
