ırımnı ilhaq etken soñ, Rusiye tehnologiyalar inkişaf ettirüv saasında «elinde qalın tayaq tutqan vahşiy» statusını qazandı. Bunı Qırım.Aqiqat Radiosı efirinde Ukraina istiqbalı institutınıñ eksperti İgor Tışkeviç beyan etti.
«Qırımnı ilhaq etkeni sebebinden, Rusiye elinde qalın tayaq tutqan vahşiy rejimine avuştı, iqtisadiy manada ise – aqaryaqıt stantsiya rejimine çevirildi. Artıq kimse, onıñ kelecekteki sanayı atılışına fırsat berecek tehnologiyalarnı satmaz ve XXI asırda üküm sürgen zemaneviy inkişaf tempi de, uçurumdan yıqılmasına beñzer», – dey Tışkeviç.
Onıñ sözlerine köre, Rusiyede yañı sanayı açılmaz, o ilhaq etken Qırımda ise,yalıñız «ekologik noqtai-nazardan zararlı olğan ve iç bazarğa mal işlep çıqaracaq zavodlar qurabilir».
«Bu arada Rusiyeniñ yıqılması kimsege (dünyada – QA) kerekmey. O Orta Asiyadaki potentsial ekstermizmnen Qıtaynıñ imperial ıntıluvını yoq ete. Onıñ içün bu devletniñ industrial devletten hammal devlet seviyesine tüşmesi dünya içün daa da kârlı», – dep qayd etti ekspert.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep ilân etti.
