Ukraina, Rusiye kibi bir qomşusı bar eken – NATOğa kirmege mecbur, dep saya Ukrainanıñ sabıq prezidenti Leonid Kravçuk.
O, Azatlıq Radiosına bergen intervyusında aytqanı kibi, Rusiye Ukrainanıñ mustaqilliginen razı olmaz ve yalıñız, «başqa çaresi» olmağanı içün qabul etmege mecbur qalır.
«Men «Ukrainanıñ NATOğa kirmesi içün» (ictimaiy areket -QA) degen komitetke reberlik yapam. Ukraina NATO azası olğan soñ, bu Rusiye içün bir darbe olur. İşte o zaman o, başqa Ukraina olmağanını, o Ukrainanen işbirlik yapmaq kerek olacağını, onı ürmet etmek, ihtiyaclarını esapqa almaq kerek olacağını añlaycaq. Ukraina ise Rusiyeniñ menfaatlarını esapqa alacaq. Böyle ihmal etmek olmaz. Rusiyeniñ strategik menfaatları bar. Olarnı muzakere eterek, çezecek yollar qıdırmalı. Amma Ukraina o zaman ayaq üstüne qaviy turar», – dedi Kravçuk.
Ukrainanıñ Rusiye basqısına nasıl etip qarşı çıqacağı aqqında aytaraq, o şunı qayd etti: «İçerdeki küçümiz – bizim ordu ve iqtisadiyatımızdır. Tıştaki küçümiz ise – NATO ve bizlerge qol tutqan devletler. Ufaq şeylerge satılmamalı. Strategik meselelerni qıdırmaq kerek – bu ise, yoqsulıqqa qarı küreş, qabarcılıqnı eñüv, cenkniñ bitirilmesi ve devletni idare etüv sisteması».
Leonid Kravçuk, Ukraina mustaqilligi tiklengen soñ 1991-94 seneleri onıñ prezidenti olıp, 2015 senesi sentâbr ayında yañıdan teşkil etilgen «Ukrainanıñ NATOğa kirmesi içün areket» adlı ictimaiy areketke yolbaşçılıq yapıp başlağan edi.
Ukrainanıñ cari tiş siyaseti 2017 senesi qabul etildi. Ukraina milliy menfaatlarınıñ «Ukrainanıñ Avropa Birligine aza olmaq maqsadınen, Avropa siyasiy, iqtisadiy ve uquqiy meydanına ve Şimaliy Atlantika Şartnamesi Teşkilâtına aza olmaq içün Avro-Atlantika meydanına integratsiyası» üstünlikler arasındadır. Lâkin em Kyiv, em de Avropa, Ukraina NATOğa kirmege azır olmağanı ve aza olmaq içün davet etilmege yaqın olmağanını tanımaqta.
NATO - Ukraina, buña azır olğanınen, er angi bir Avropa devleti kibi, Şimaliy Atlantik şurasına kirebilecegini ve NATOğa kiriş meselesine, üçünci bir taraf iştirak etmeden, Ukraina özü qarar berecegini beyan etmekte. Rusiye ise aksine, Ukrainanıñ NATOğa kirmesine bütünley qarşı çıqa ve şuradan «Ukrainanıñ anda qabul etilmeycegine dair garantiya» berilmesini talap ete.
