Link açıqlığı

Rusiyeliler Qırım sakinlerine Yaltada az. Pötr ve Fevroniyağa eykeller qoymaq vade ettiler


Yaltanıñ pekitilgen yalı kenarı

2018 senesiniñ baarinde Yaltadaki pekitilgen yalı kenarında Muromlı az. Pötr ve Fevroniyağa eykeller qoymaqnı planlaştıralar. Bunı «RİA Novosti» haber agentligine Rostovdaki Dementyev demir töküv işhanesiniñ yolbaşçısı Dmitriy Plotnikov bildirdi.

Plotnikov: «Eykel bir dalğa şeklinde yapılacaq. Zirvesinde gemi ve gemide Pötr ve Fevroniya turacaqlar. Uzatılğan qollarında, avuçlar içinde beraber gögercinni tutacaqlar», – dep, eykelniñ tunçtan yapılacağını, ve (temel taşsız) yüksekligi 3,5 metr olacağını ilâve etti.

İşlerni 2018 senesiniñ aprelinde bitirmek isteyler. Eykelni kurort sezonınıñ başında Yaltanıñ pekitilgen yalı kenarında qoymaq isteyler.

Rusiye ortodoks kilsesi tarafından aziz olaraq ilân etilgen Pötr ve Fevroniya ortodokslar tarafından qoranta ve evlenüv imayecileri sayılalar.

Rusiyede aile, sevgi ve sadaqat künü iyülniñ 8-nde qayd etile. Bu bayram, ortodokslarnıñ ananesinde qoranta ve evlenüv imayecileri sayılğan az. knâz Pötr ve onıñ apayı Fevroniyanıñ añma kününe doğru ketirilip tayin etildi.

Ukrainada iyülniñ 8-nde prezidentniñ 2011 senesindeki fermanı ile tayin etilgen Aile künü bayramı qayd etile.

XS
SM
MD
LG