17 yıllıq teneffüsten soñ Qazahistan ve Özbekistan arasında avtobuslar qatnap başladı.
Yanvarniñ 5-nden itibaren avtobuslar Özbekistan paytahtı Taşkent ile Qazahistan cenübindeki Şımkent şeeri arasında qatnaylar.
Cenübiy Qazahistan yolcu naqliyatı idaresiniñ yolbaşçısı Nurlan Bayğut Azatlıq.Radiosına aytqanına köre, avtobus Qazahistan-Özabekistan sıñırını qısqartılğan usulda kesip keçecek eken.
Onıñ szölerine köre, er kün şeerler arasında 15 dane avtobus qatnaycaq eken. Şeerler arasındaki mesafe 140 km teşkil ete.
Qazahistan akimiyeti daa evel beyan etkenine köre, Qazahistan ve Özbekistannıñ diger şeerleri arasındaki avtobus bağı yavaş-yavaş tiklenecek eken.
Qazahistanda özbek milletine mensüp yarım millionğa yaqın vatandaş devletniñ cenübiy vilâyetlerinde yaşay. Aynı zamanda, 800 biñ etnik qazahlarnıñ ekseriyeti Taşkent vilâyetinde yaşay ve Qazahistanda olarnıñ aqrabaları bar.
Devletler arasındaki yolcu naqliyatı 2000 senesi Özbekistannıñ o devirdeki prezidenti İslam Karimov ve Qazahistan prezidenti Nursultan Nazarbayev arasındaki munasebetlerniñ kergin olğanından dolayı bütünley kesilgen edi.
Şavkat Mirziyoyev Karimovnıñ vefatından soñ, 2016 senesi Özbekistan prezidenti olaraq saylânğanında, tış siyasetniñ esas yönelişlerinden biri qomşu devletlernen munasebetlerniñ eyileşmesi olacaq, dep beyan etken edi.
