Yanvarniñ 4-nde Ukrainanıñ Vaqtınca işğal etilgen territoriyalar ve devlet içinde mecburen köçken şahıslarnıñ meseleleri boyunca nazirligi, 2017 senesi dekabrniñ 1-nden 2018 senesi yanvarniñ 1-ne qadar müddet zarfında 26 yük gemisi ilhaq etilgen Qırım limanlarına kiriş yasağını bozdı, dep bildirdi.
Bildirüvde: «Bu gemiler tarafından Keriç, Aqyar ve Kefe limanlarına cemi olaraq 82 kiriş yapıldı. 25 gemi Rusiye Federatsiyasınıñ bayrağı altında ve 1 gemi Syerra-Leone Cumhuriyetiniñ bayrağı altında kirdiler», – denile.
Ondan ğayrı, muessisede, limanlarda gemilerniñ duraqları olaraq qullanılğan yerlerde Moldova, Malta, Togo, Palau, Sent-Kristofer ile Nevis Federatsiyası ve Komor Adaları İttifaqınıñ gemileri qayd etildi.
2017 senesiniñ noyabrinde yasaqnı bozğan 25 gemi qayd etildi. Olardan 21 gemi Rusiyenin ve 4 gemi Togo Cumhuriyeti, Syerra-Leone ve Palaunıñ bayraqları altında ediler.
2014 senesiniñ iyülinden başlap Ukraina akimiyeti Rusiye tarafından ilhaq etilgen Qırımdaki bütün limanlarınıñ çalışqanını resmen toqtattı. Yarımadanıñ limanları halqara deñiz naqliyatı içün qapaldı.
Halqara teşkilâtlar Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
