Aqmescitte Lesi Ukrainki rayonındaki Hatice Kantemirova ve Zera Bazirovanıñ evletinde yapılğan tintüvler yekünlendi. Tintüvler esnasında diyiy edebiyat musadere etildi. Bunı yanvarniñ 5-nde «Qırım birdemligi» birleşmesi Facebookta bildire.
Bildirüvde: «Ev sakinleriniñ aytqanına köre, ögüni aluv tahqiqat tedbirleri yapıldı. Araştıruv yapıldı, lâkin kâğıtlarda Kyiv rayonı mahkemesiniñ qararı añıla… Telefon ve planşetni musadere ettiler. Bir qadınnıñ oğlu Türkiye ve Beyazrusiyege barğan edi. Onı bu hususta soraştırdılar. Ondan ğayrı, Ekstremizmge qarşı küreşüv boyunca merkezniñ hadimleri tarafından adları söylengen şahıslarnı tanıp tanımağanını tayin etmege tırıştılar. Protokolnıñ kopiyasını qaldırmadılar. Kâğıtlar kerek olsa, olarğa kelsinler, dediler», – denile.
«Qırım birdemligi», evlerniñ sakinleri video şeklinde izaat bermekten vazgeçtiler, dep qayd ete.
Bundan evel cuma künü Usadebnaya (Markoviça) soqağı 34 ve Turistov soqağı 49 adresleri boyunca yerleşken evlerde yapılğan tintüvler aqqına haber alındı.
Qırım Rusiye tarafından ilhaq etilgen soñ yarımadada muntazam surette mustaqil jurnalistler, qırımtatar faaliyetçileri, muhalefet ve Ukraina tarafını tutqan cemiyet erbapları ve diniy azlıqlar vekilleriniñ yaqalanuvları, tintüvleri ve sorğulamaları yapıla. Aq-uquq qorçalayıcıları Rusiye telükesizlik hadimleriniñ bu areketlerine siyasiy maqsatlı areketler deyler.
