Link açıqlığı

Sudaqta qırımtatar faalleri gençlerni milliy arekette daa da faal iştirak etmege çağırdı


Sudaqta qırımtatar faalleriniñ toplaşuvı

Sudaqta, İnsan aqları boyunca Qırım kontakt gruppasınıñ teşebbüsinen yarımada tamır halqınıñ milliy areketinde geçlerniñ daa da faal iştirak etüvge celp etmek meselesi muzakere etilgen qırımtatar faalleriniñ körüşüvi ötkerildi.

Körüşüvde söz, hususan «areketniñ yañartılması ve gençleçtirilmesi» aqqında yürsetildi, dep ikâye etti Qırım.Aqiqatqa İnsan aqları boyunca Qırım kontakt gruppasınıñ koordinatorı Abdureşit Cepparov.

Onıñ sözlerine köre, böyle körüşüvler ilhaq etilgen Qırımnıñ diger regionlarında da keçirilmesi planlaştırılmaqta.

Tedbirde iştirak etken qırımtatar faali Nariman Celâl gençlerni qırımtatar milliy areketine daa da faal sürette qoşulmağa çağırdı.

«Elbette, bügünki künde er bir faal insan küç idareleriniñ basqısı altına tüşebile, lâkin bundan qorqmağa acet yoq. Bizler, ekseriyet olaraq, bunen yaşay ve işimizni devam etmege areket etemiz», – dedi o.

Aynı zamanda körüşüv teşkilâtçıları gençlerni Qırım siyasiy mabüsleriniñ ailelerine qol tutmaq maqsadınen para toplanuvında iştirak etmege, qırımtatar faalleriniñ mahkemeleri kelmege, faal blogger olmağa, qırımtatar milliy areketi tarafından teşkil etilgen tedbirlerge qoşulmasına çağırdı.

Qırım Rusiye tarafından ilhaq etilgen soñ, yarımadada mustaqil jurnalistler, cemaat ve qırımtatar milliy areketiniñ faalleri, Meclis azaları ve «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.

XS
SM
MD
LG