Suvdağda Kolhoz plâjınıñ yanında bölgede belli olğan qırımtatar faaliyetçisi, hayratçı, bölgedeki musulman cemaatınıñ reisi Smail Abduramanovğa ait «Esanna» kafesini yıqalar. Bunıñ resmiy sebebi – deñiz kenarındaki yüz metrlik zonada bulunğan binalarnıñ demontajıdır.
Smail Abduramanovnıñ qızı Fatme Saliyeva, Qırım.Aqiqatqa ikâye etip: «Bu akimiyet tarafından pekitilgen yalı kenarında yıqtırılmasına qarar berilgen birinci obyekttir. Bu mesele boyunca mahkeme davası daa devam ete, lâkin akimiyet, mahkeme qararını beklemeyip, kafeni yıqıp başladı», – dedi.
Qırımnıñ Rusiyege tabi yolbaşçısı, obyektlerniñ yıqtırılması boyunca qararlar cemaat, uquqqoruyıcı organlar, deputatlar ve yerli icra akimiyetiniñ iştirakinen qabul etilecekler, dedi. Lâkin Abduramanovlar qorantasınıñ malümatına köre, olarnıñ evinde bu mevzuda muzakereler yapılmadı.
Akimiyet, mahkeme qararını beklemeyip, kafeni yıqıp başladıFatme Saliyeva
Fatme Saliyeva şöyle qayd ete: «Babam şeer içün çoq faydalı şeyler yaptı. Mektepniñ tamiri içün para berdi, temizlev yapıları içün 200 biñ hrivna ve aynı miqdarda paranı qazanlı soba hanesine ayırdı, Şeer fonduna büyük para qoydı. Suvdağnıñ Yañı Maalle massivinde yol yasattı. Şeerge köstergen yardımnıñ cemisi million hrivnadan bayağı ziyadedir. Ya adiy adamlarğa em maddiy, em de diger ceetlerden ne qadar yardım etti? Şeer şurasınıñ deputatı edi. Şeerde o, belli cemaatçı ve hayratçıdır».
Cemaatçı, işini zenginleşmek içün degil de, şeerniñ inkişafı içün yapqanını iddia ete.
Er vaqıt kelecek içün çalışa edim, şimdi ise onı menden tutıp alalarSmail Abduramanov
Smail Abduramanov Qırım.Aqiqatqa: «Aman-aman bütün paralarımnı inkişaf içün sarf ete edim. Şimdi kafemni yıqqan yerlerinde 1989 senesinden berli çalışam. Başta adiy şiş kebapçı olıp çalıştım. Er qazanğan kâpigimni işke qoya edim. Plâjnı sekiz metrge kenişlettim. Andan 500 yük maşinası topraq çıqartıp, qum ketirttim. Plâjnı abadanlaştırdım. Tireme divarını pekittim. Cemiyet ayaqyolunı yaptırdım. Kestane tereklerini saçtım. Olarnı almaq içün mahsus Kavkazğa bardım. Kelecek içün çalıştım. Qorantamnı da işke celp ettim. Qorantam ise balaban – beş bala ve yigirmi beş torunım bar. Qorantamıznıñ işinde sezonda altmış kişi resmen qayd etilip çalışa. Er vaqıt kelecek içün çalışa edim, şimdi ise onı menden tutıp alalar», – dep ikâye etti.
Kafe içün çekken qasevetler cemaatçınıñ sağlığına tesir etti. O, hastahanege yatmağa mecbur oldı.
Qırım insan aqları boyunca alâqa grubunıñ koordinatorı Abdureşit Cepparov kafe yıqtırılğan yerni ziyaret etti.
Aq-uquq qorçalayıcısı, Qırım.Aqiqat içün vaziyetni izalap: «Smail Abduramanov çoqtan berli qırımtatar milliy areketinde iştirak ete. Teessüf ki, añlağanım qadar, topraqnıñ kirası içün kerek olğan vesiqanıñ olmağanı, kafesiniñ yıqtırılması içün sebeplerden biri oldı. Binanıñ özünde saiplik aqqını isbatlağan vesiqa bar, binanıñ tübündeki topraqnı ise, aytqanına köre, bütün kerekli uyğunlaştırmaları olsa da, yerli akimiyet türlü sıltavlar ile oña kirağa bermedi. Pekitilgen yalı kenarındaki pek çoq binalar arasında o, eñ çoq aq qazanğan vatandaşlardan biridir. Şeerniñ inkişafına qoşqan issesine köre, oña qarşı böyle şey yapmaq, insafsızlıqtır», – dedi.
Qırımnıñ Rusiyege tabi yolbaşçısı Aksönov: «Yüz metrlik zonada qanuniy olaraq bulunğan, inkişaf içün mania olmağan, bergiler tölegen ve plâjğa qatnamağa keder etmegen bazı obyektler Devlet şurası tarafından qanuniyleştirile bilecekler», – dep farz etti, lâkin: «Aynı zamanda yıqtırılğan obyektlerniñ topraqlarında bundan soñ iç bir qurucılıq yapılmaycaq», – dedi .
Fatme Saliyevanıñ malümatına köre, qoranta daa Ukraina mahkemesiniñ qararına binaen deñiz yanındaki kafesini yıqtı ve, akimiyetnen uyğunlaştırıp, plâjdan uzaqça yerde yañısını qurdı. Şimdiki akimiyet ise bu yañısını da yıqa.
Polis kafemiz yanında «maski-şou» yaptı. OMON ve polis, bütün etrafnı qamaçavğa alıp, adamlarnı yibermedilerFatme Saliyeva
Fatme Saliyeva Qırım.Aqiqatqa: «Dekabrniñ 29-nda polis kafemizniñ yanında «maski-şou» yaptı. OMON ve polis bütün etrafnı qamaçavğa alıp, adamlarnı yibermediler. O künden başlap, demontaj devam ete. Bundan soñ nasıl çalışacaqmız – aqlıma bile kelmey», – dep ikâye etti.
Yerli akimiyet, 19.11.2014 tarihlı 15677/17/82001-İP nomeralı icra protsessi materiallarına muvafıq olaraq areket etkenini iddia ete. İcra mevzusı: izinsiz qurulğan yapılarnı yıquv ve Suvdağ şeer şurasınıñ topraqlarında yerleşken umumiy meydanlığı 0,08 ha olğan izinsiz zapt etilgen topraq arsasını azat etüv.
