ABD tarafından sanktsiyalar kirsetilüv telükesinden dolayı, Rusiyeniñ en büyük «Alfa-bank» hususiy bankı Rusiye arbiy-sanayı kompleksiniñ işhanelerine hızmet bermekni toqtattı. Bu aqta «Eho Moskvı» radiostantsiyasına bank müdirler keñeşi reisiniñ birinci muavini Oleg Sısuyev ikâye etip berdi.
«Biz olarnen munasebetimizni qopardıq degen manağa kelmey. Biz risklerimizni azlaştırmağa areket etemiz», - dep qayd etti Sısuyev. Onıñ sözlerine köre, mudafaa kompleksiniñ işhaneleri «Alfa-bank» kreditleriniñ esas qısmını teşkil ete eken.
Daa evel Londonda yaşağan «Alfa-bank» saiplerinden biri olğan Mihail Fridman, «Forbs» mecmuasına bergen intervyusında, sanktsiyalar Rusiye mudafaa işhanelerine köstergen hızmeti bankqa tesir etkenini tanığan edi.
Amerika Birleşken Devletleri Qırımnı ilhaq etkeni, Ukraina şarqındaki cenk ve ABD prezident saylâvına qarışması ihtimalinden dolayı Rusiyeniñ bazı şahıs ve şirketleri, şu cumleden mudafaa saasınıñ bazı işhaneleri ve devlet strurkturalarına qarşı sanktsiyalar kirsetken edi. 2017 senesi Kongress tarafından qabul etilgen qanun mücibi, amerikan memuriyeti, Rusiye küç idaresi strukturaları ve arbiy-sanayı kompleksinen işbirlik yapqan şahıs ve teşkilâtlar esabına sanktsiyalar cedvelini arttırabilecek.
