Link açıqlığı

Saatnıñ esas haberi

AQŞ kelecek eki kün içinde Pakistanğa qarşı yapacaq «konkret areketler»ini ilân etecekler


AQŞ prezidenti Donald Trampnıñ Memuriyeti Pakistandan terrorizmge qarşı küreşte daa çoq ğayretni talap etip, kelecek eki kün içinde İslamabadğa tazyıq etmek maqsadınen yapacaq olğan «konkret areketler»ni ilân etecek ola. Bunı Azatlıq Radiosı bildire.

Yanvarnıñ 2-sinde Beyaz evniñ temsilcisi Sara Sanders brifingde: «Olarnıñ (Pakistannıñ – QA) terrorizmni toqtatmaq içün daa çoq şey yapa bileceklerini bilemiz, ve bunıñ yapqanlarını isteymiz», – dedi.

Bundan daa evel, AQŞ prezidenti Donald Tramp Pakistan akimiyetini ekstremistlerge sığınaq bergeninde qabaatlap, maliy yardımnıñ toqtatılması ile qorquzğan soñ yanvarniñ 2-sinde Pakistan TİNi İslamabaddaki AQŞ elçisini suhbet içün çağırdı. AQŞ elçiliginiñ matbuat hizmeti bildirgeni kibi, Devid Geyl Pakistannıñ resmiy temsilcileri ile körüşüvge çağırıldı.

Diplomatlar, elçiniñ çağırılması ile alâqalı diger detallerni bildirmediler.

Yanvarniñ 1-nde AQŞ prezidenti Donald Tramp Twitterde, İslamabadnı ekstremistler içün emniyetli şaraitler yaratqanında qabaatlap, Pakistan akimiyetini maliy yardım berilmesiniñ toqtatılacağı ile qorquzdı.

Pakistannıñ Tış işleri nazirliginde, soñki 16 yıl içinde İslamabad AQŞqa, ittifaqdaş olaraq, ekstremistlerni yoq etmege yardım etti, Qoşma Ştatları ise İslamabadğa «aqaretlev ve işanmazlıqtan başqa bir şey» bermedi, dep cevap berdiler.

AQŞ prezidenti Donald Tramp ve vitse-prezident Mayk Pens evelden de Pakistannı terroristik gruplarğa qol tutuvda qabaatladı. İslamabadda bunı red ettiler.

XS
SM
MD
LG