AQŞ prezidenti Donald Tramp yañı yıldaki birinci tvitinde bir vaqıtları Amerikanıñ yaqın ittifaqdaşı olğan Pakistannı «yalan ve iylekârlıq»ta qabaatladı. Bunı Azatlıq Radiosı bildire.
Tramp: «Soñki 15 yıl zarfında olar bizden 33 milliard dollar aldı, biz ise olardan yalandan başqa bir şey almadıq: olar bizim yolbaşçılarımıznı deli saya», – dep yazdı.
Amerika prezidenti İslamabadnı, AQŞ tarafından Afğanistanda qarşılarına cenk alıp barğan islamist uruşçılarına sığınaq bergeninde qabaatlap, böyle bir taraflama munasebetlerniñ toqtatılacağını vade etti.
Pakistan mudafaa naziri Hurram Dastgir-Han buna cevaben Twitterde, «devletimiz, Amerika arbiy hadimlerine alâqa hizmetleri ile bazalar berip ve keşfiyat malümatı ile paylaşıp, terrorizmge qarşı küreşte er vaqıt AQŞnıñ sadıq ittfaqdaşı edi, lâkin amerikalılar, öz tarafından, Pakistanğa aqaretlev ve işanmazlıq ile teşekkürlerini bildirdi», dep yazdı.
Yanvarniñ 1-nde bazarertesi künü Beyaz ev, daa 2016 senesinde tayin etilgen arbiy yardım boyunca Pakistanğa 255 million dollar bermeycegini bildirdi. Memuriyet Pakistandan, devletiniñ territoriyasında «Haqqani ağı» kibi Taliban areketine yaqın olğan gruplarınıñ faaliyetini toqtatmaqnı talap ete. İslamabad ise, bu yönelişte mümkün olğanınıñ episini yapqanını iddia ete.
