Link açıqlığı

Mısırda sabıq prezident Mursi, mahkeme akimiyetini aqaretlegeni içün üç yıl apis cezasına mahküm etildi


Muhammed Mursi

Mısırda mahkeme, sabıq islâmcı prezident Muhammed Mursini mahkeme akimiyetini aqaretlegeninde qabaatlap, üç yılğace azatlıqtan marum etüvge mahküm etti.

Dekabrniñ 30-nda Qairedeki mahkeme, Mursi dörtten ziyade yıl evel açıq çıqış yapqanda «nefretni kenişletmek maqsadınen» mahkeme akimiyetini aqaretledi, dep qarar berdi. Bunı devlet televideniyesi bildire.

Ondan ğayrı mahkeme, bu iş boyunca muhakeme etilgen daa 18 kişini üç yıl azatlıqtan marum etilüvge mahküm etti. Daa beş kişige 30 000 Mısır funtı (1688 AQŞ dolları) miqdarına cöreme tayin etildi.

Mursi Mısırnıñ birinci serbest saylanğan prezidenti edi. 2013 senesinde arbiy hadimler onı prezidentlikten alıp taşladılar. Bu, onıñ zıddiyetli üküm sürüvine qarşı bir yıl devamında kütleviy surette narazılıqlar kösterilgen soñ oldı. Ondan soñ oña qarşı bir sıra qabaatlav ve bu cümleden casuslıqta qabaatlav boyunca mahkeme protsessleri alıp barıla.

XS
SM
MD
LG