Rusiye prezidenti Vladimir Putin dekabrniñ 29-nda Suriyeniñ Tartus limanındaki Rusiye Arbiy deñiz flotu (ADF) bazasınınıñ kenişletilmesi aqqında añlaşmanı tasdiqladı. Qanun, Rusiyeniñ resmiy uquq informatsiyası internet-portalında ilân etildi.
Añlaşmağa binaen, Suriye Rusiyege liman etrafındaki topraqlar ve taşınmaz malnı bedava qullanuv içün bere. Rusiye Mudafaa nazirliginde, añlaşma ADF maddiy-tehnikiy temin etüv noqtası territoriyasını 24 hektarğace kenişletmege imkân bere, dep qayd ettiler. Aynı zamanda Rusiye limannıñ infrastrukturası – sabit rıhtımlar (priçallar) ve anbar obyektlerini qullana bilecek.
Bazanıñ kenişletilmesi içün masraflar yılda 3,2 milliard ruble teşkil etecekler.
Vesiqa, Tartusta bir arada 11 geminiñ bulunması mümkün olğanını tayin ete. 2017 senesi yanvarniñ 18-nde imzalanğan añlaşmanıñ muddeti 49 yıldır. Onıñ avtomatik şekilde 25 yıllıq muddetlerge uzatılmasınıñ imkânı bar.
Dekabrniñ 26-nda Rusiye parlamentiniñ yuqarı palatası olğan Federatsiya şurası, Aq deñizdeki Tartus limanında bulunğan arbiy deñiz bazasında Rusiye askerleriniñ yerleştirilmesine dair Moskva ve Suriyedeki Başar Asadnıñ akimiyeti arasında yapılğan añlaşmanıñ tasdiqlanması aqqında qanunnı maqul etti.
Uzun muddet zarfında Dimaşqnıñ ittifaqdaşı olğan Moskva, prezident Başar al-Asadnıñ rejimine qol tutmaq maqsadınen 2015 senesiniñ sentâbrinde Suriyede ava kampaniyasını başladı.
Ondan ğayrı Rusiyeniñ arbiy hadimleri Latakiya vilâyetindeki Hmeymim ava bazasında bulunmağa devam etecekler.
