Vladimir Putinniñ Rusiye prezidenti vazifesine namzet olaraq kösterilmesi içün rey bergen teşebbüsçi grubunıñ toplaşuvından evel Aleksey Pimanovnıñ «Krım» («Qırım») ve Oliver Stounnıñ «Putin» filmleri kösterildi.
Azatlıq Radiosı bildirgeni kibi, teşebbüsçi grubunıñ toplaşuvı dekabrniñ 26-nda Moskvada VDNHda (Devlet iqtisadiyatı muvafaqiyetleri sergisinde) keçti. Tedbirde 600-ğa yaqın kişi iştirak etti. Olarnıñ arasında siyasetçilerden ğayrı balet artisti Nikolay Tsiskaridze, rejissör Vladimir Hotinenko, aktörlar Mihail Boyarskiy ve Vladimir Maşkov, dizayner Valentin Yudaşkin, piyanocı Deniz Matsuyev, Comedy Club rezidentleri Garik Harlamov ve Mihail Galustân, sovet hokkeycisi Vladislav Tretyak ve qarışıq dögüşüv sanatları boyunca dünya çempionı Födor Yemelyanenko buluna ediler.
Putin özü bu tedbirde yoq edi. Onıñ matbuat kâtibi Dmitriy Peskov dekabrniñ 25-nde, şimdiki prezident meşğul olğanından tedbirde iştirak etmeycek, dep añlattı.
Rusiye prezidentiniñ saylavını 2018 senesi martnıñ 18-nde – Qırım ilhaqınıñ yıllığında ötkermekni planlaştıralar. Daa evel saylav kününiñ başqa künge keçirilmesine dair qanun, Rusiyeniñ Devlet duması ile Fedratsiya Şurası tarafından tasdiqlanıp, Rusiye prezidenti Vladimir Putin tarafından imzalandı.
Şimdiki devlet yolbaşçısı Vladimir Putin 65 yaşında. O, Rusiyeni 1999 senesiniñ soñundan başlap idare ete. 13 yıl devletniñ prezidenti ve daa 4 yıl Rusiye akimiyetiniñ başlığı vazigesinde bulundı. Dekabrde Putin özüni dörtünci kere prezident saylavına namzet köstermek niyetini bildirdi.
Rusiyede «Krım» filminiñ premyerası sentâbrniñ 28-nde olıp keçti. Filmniñ yaratıcıları o, 2014 senesinde Rusiye tarafından yarımadanıñ ilhaqı fonunda «sevgi, inam, namus, ruh quveti ve kerçek bir dostluq tarihı» aqqında ikâye ete, dep sayalar. Rusiye kinematografı içün bu, propaganda noqtai-nazarından muim olğan adiselerniñ motivleri esasında tolu metrajlı bediiy filmler çıqarıluvınıñ birinci tecribesi degil.
