Rusiyeli advokat Nikolay Polozov Rusiye prezidenti Vladimir Putinniñ memuriyetine, qırımtatar Milliy Meclisiniñ muavinleri Ahtem Çiygoz ve İlmi Umerov adından olarnıñ azat etilgeninen bağlı malümat berilmesini talap etken eki dane memuriy davanı teslim etti.
«Af etilüvnen bağlı fermanlarnıñ gizlenmesi RF Anayasasınıñ 24 maddesiniñ 2-nci qısmına zıt kele», – dep yaza Polozov özüniñ Facebook saifesinde.
Bu yıl sentâbr ayında Kreml nezaretindeki Qırım Yuqarı mahkemesi Ahtem Çiygoznı 8 yıllık koloniya cezasına mahküm etken edi. O, 2015 senesi yanvar ayında 2014 senesi fevralniñ 26-nda Qırım Yuqaru Şurası binasınıñ ögünde Ukrainanıñ topraq bütünligine bağışlanğan mitingde iştirak etkeni içün tutulıp alındı. Çiygoz kütleviy nizamsızlıqlar teşkil etmekte qabaatlanğan edi.
Ondan soñ mahkeme İlmi Umerovnı Qırımda eki yıl köy tarzındaki koloniyada qaluv cezasına mahküm etken edi. Umerov açıq menbalarda yapılğan separatizmge çağıruv yapmaqta qabaatlandı.
Rusiye akimiyeti oktâbrniñ 25-nde Umerov ve Çiygoznı azat etip, Türkiyege teslim etti. Daa soñra qırımtatar halqı Milliy Meclisiniñ yolbaşçıları Kyivge keldiler.
Kreml Umerov ve Çiygoznıñ azat etilgenine dair vesiqalarnı bermekni red etti. Advokat Nikolay Polozov iddia etkenine köre, Umerov ve Çiygoz «uquqiy ceetten daa Qırımda bulunmaqta», çünki olarnıñ Türkiyege keteceginen alâqalı iç bir türlü vesiqa berilmegen edi.
