Kremlniñ kontroli altında bulunğan Aqmescit rayon mahkemesi dekabrniñ 26-nda yarımadada qırımtatarlar, musulmanlarnıñ tintüvleri ve tevqiflerine qarşı bir kişilik piketniñ iştirakçisi Rustem Emirsuyinovğa cöreme tayin etti.
Bunı «Qırım birdemligi» cemiyet birleşmesi bildire.
Mahkeme Emirsuyinovğa 10 000 ruble (4400 hrivna – QA) miqdarındaki cöreme şeklinde cezanı tayin etti.
Dekabrniñ 18-nde Qırımda, daa evel tintüvler ve tevqiflerge cevaben bir kişilik piketlerge çıqqan qırımtatarlarniñ işleri boyunca mahkeme oturışuvları ötkerildi. Olarğa qarşı, piket ötkerilmesiniñ tayin etilgen tertibini bozğanları munasebeti ile (Rusiyeniñ Memuriy tertip bozuv aqqında kodeksi, madde 20.2, 5-nci qısım) memuriy protokollar tizildi.
Mahkeme oturışuvları, cümleden, Aqmescit, Canköy, Aluşta, Suvdağ ve bunıñ kibi de İçki, İslâm-Terek, Qarasuvbazar ve Qurman rayonlarında ötkerildi. İçki işler nazirliginiñ Qırım boyunca ekspertiza merkezi tarafından «piketler bir maqsat, bir niyet ve umumiy teşkil etilüv ile birleştirile» şeklinde berilgen hulâsa, qabaatlav tarafınıñ esas delili olaraq qabul etilmekte.
Qırımda oktâbrniñ 14-nde, Rusiye tarafından ilhaq etilgen yarımadada telükesizlik hadimleriniñ qırımtatarlarğa, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
