Aqmescitte Rusiye telükesizlik hadimleri Darvina soqağındaki tintüvden soñ qadınnı alıp ketti.
Bunı Qırım.Aqiqat muhbiri bildire.
Onıñ malümatına köre, Darvina soqağında yaşağan qadın, ihtimal ile ev bikesi, «Gazel» avtomobillerinden birine oturdı. Bildirilgenge köre, bu esnada telükesizlik hadimleri küç qulllanmadı. Qadınnıñ adı şimdilik belli degil.
«Qırım birdemligi» cemiyet birleşmesiniñ malümatına köre, telükesizlik hadimleri qadınnı Kyivska soqağında bulunğan Qırım boyunca tahqiqat komiteti idaresine alıp kettiler.
Faaliyetçiler, ekinci tüntüv yapılğan yerde, Hayri Emir-zade soqağında 5 ufaq bala ile 2 qadın buluna edi, dep qayd ettiler. Faaliyetçiler, telükesizlik hadimleri evniñ eki qatında da tintüv yapa, dep bildireler. Yaqalanuvlar aqqında haber yoq. «Tahqiqat tedbirleri» yapılğan yerge qomşular ve soylarnı yibermeyler.
Daa evel, dekabr 26, salı künü Aqmescitte Rusiye telükesizlik hadimleriniñ Darvin ve Hayri Emir-zade soqaqlarında tintüv etkenleri belli oldı.
Rusiye telükesizlik hadimleri tarafından açıq menbalarda bu hususta izaat berilmedi.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
