Link açıqlığı

Rusiye prezidentligine namzet olacağını bildirgen Lenin adına sovhoznıñ müdiri Pavel Grudinin, ilhaq etilgen Qırımnı «Rusiye» toprağı deyerek, prezident olaraq saylânğan taqdirde, yarımadanı keri «qaytarmaycağı» aqqında ayta.

Bunı Grudinin Rusiyeniñ «Birinci kanalında» keçken «Vremya pokajet» yayınınıñ eferinde bildirdi.

«Qırım – Rusiye toprağı, qalğan detallerni muzakere etmek mümkün. Bunı yapmaq içün tış işleri naziri bar, kerçek, yaramay birisi sayılmaz», – dep ayttı Grudinin. O, «böyle meselelerni yalıñız çezmeycegini de» ilâve etti.

Belli olğanı kibi, dekabrniñ 23-nde Rusiye Federatsiyası Kommunist Firqası adına (KPRF) Rusiye prezidentligine namzet olaraq Moskva civarında yerleşken Lenin adına sovhoznıñ müdiri Pavel Grudinin kösterildi.

Rusiye prezidentiniñ saylâvını 2018 senesi martnıñ 18-nde – Qırım ilhaqınıñ yıllığında ötkerilmesi planlaştıralar. Daa evel saylav kününiñ başqa künge keçirilmesini közde tutqan mütenasip qanun, Rusiyeniñ Devlet Duması ile Fedratsiya Şurası tarafından tasdiqlanıp, Rusiye prezidenti Vladimir Putin tarafından imzalanğan edi.

Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey.Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü olaraq qabul etti.

XS
SM
MD
LG