Dekabrniñ 25-nde Kreml nezaretindeki Merkeziy rayon mahkemesi oturışuvında «26 fevral işi» boyunca prokuror qabaatlav hulâsasınıñ yañı, artıq üçünci şeklini bildirdi.
Qırım.Aqiqat muhbiri haber etkenine köre, vesiqada qırımtatar Milliy Meclisi reisiniñ muavini Ahtem Çiygoz Qırım Yuqarı Radası ögündeki «kütleviy nizamsızlıqlarnıñ teşkilâtçısı» ola eken.
Qabatlav hulâsasında binaen, mahküm Ali Asanov, Mustafa Degermenci, Eskender Emirvaliyev, Talât Yunusov ve Kantemirov «Meclis reberleri bergen talaplarğa boysunaraq, qaba bir şekilde ictimaiy tertipni bozğan ve areketlerini qaba quvet qullanğanlar».
«26 fevral işi» boyunca nevbetteki oturışuvı 2018 senesi yanvarniñ 11-ne keçirilmesi planlaştırıla.
2015 senesinde bir grup qırımtatar faaliyetçilerge qarşı 2014 senesi fevralniñ 26-sında Qırım Yuqarı Radası binasınıñ divarları yanında Ukrainanıñ topraq bütünligine qol tutmaq maqsadınen yapılğan mitingde iştirak etkenleri içün mahkeme başlandı. Olar kütleviy nizamsızlıqlarda iştirak etüvde qabaatlana.
Daa soñra mahkeme «Fevral 26 işi»ni ekige ayırdı: qırımtatar milliy areketiniñ liderlerinden biri Ahtem Çiygoznıñ işi, davanıñ diger figurantları olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nabiyevniñ işinden ayırıldı.
Rusiye akimiyeti oktâbrniñ 25-nde Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umeriv ve Çiygoz Kyivge keldiler.
