Link açıqlığı

Siyasiy repressiyalarnıñ qurbanlarına, reabilitatsiya aqqında arizalarnı baqıp çıquv muddetini nasıl etip qısqartmaq mümkün olacağını añlattılar


Qırım sakinlerini, reabilitatsiya aqqında arizalarnı baqıp çıquv muddetini qısqartmaq imkânı bar, dep haberdar eteler. Aqyar boyunca Rusiye İçki işler nazirliginiñ idaresi (İİNİ) bildirgeni kibi, sürgün etilgen vatandaşlar, mahsus meskün yerlerde bulunuv adisesi aqqında arhiv spravkalarınıñ (malümat bergen vesiqa – QA) berilmesine dair arizanı şahsen yollay bileler.

Munasip izaat Aqyar boyunca Rusiye İİNİ saytında dekabrniñ 21-nde ilân etildi.

Bildirüvde: «Aqyar boyunca Rusiye İİNİ, 1917 senesi oktâbr 25 (noyabr 7) kününden başlap memuriy tertip ile alâqalı olaraq Qırım vilâyeti territoriyasından sürgün etilgen ermeni, bulğar, yunan, qırımtatar ve nemse halqlarına ait vatandaşlarnı, mezkür halqlarğa ait şahıslarnıñ mahsus meskün yerlerde bulunğanları adisesi aqqında arhiv spravkalarını almaq içün Özbekistan Cumhuriyeti İçki işler nazirligi (İİN), Tacikistan Cumhuriyeti İİN ve Qırğızıstan Cumhuriyeti İİNniñ muayen bölge bölüklerine arizalarnı şahsen yollamağa imkânları olğanına dair haberdar ete», – denile.

Bunıñ sayesinde siyasiy repressiyalar qurbanlarınıñ reabilitatsiya aqqında arizalarını baqıp çiqmaq içün lâzim muddetni qısqartmaq ve bunıñ kibi de Rusiye ve mezkün devletlerdeki muessiseler arasında keçmişke ait malümatlarnen deñişmek içün lâzim vaqıtnıñ sarf etilmesinden qaçınmaq mümkün olacaq, dep qayd etile.

Qırımda oktâbrniñ 24-nde Kremlniñ kontroli altında bulunğan Halqara munasebetleri ve yarımadanıñ sürgün etilgen vatandaşlarınıñ işleri boyunca komitetniñ yañı rehberi tayin etildi. Muessiseniñ başına Lenur Abduramanov qoyuldı.

Muessiseniñ bundan evelki rehberi Zaur Smirnov oktâbrniñ 16-sında istifa etti. Daa soñra Rusiye tarafından tayin etilgen Qırım yolbaşçısı Sergey Aksönov, Smirnovnıñ onıñ talabınen, «işi semeresiz olğanı içün» istifa etkenini söyledi.

XS
SM
MD
LG