Bağçasaraylı «Hizb ut-Tahrir işi» figurantı Seyran Saliyevniñ ömür arqadaşı Mumine Saliyeva Qırımda insan aqlarınıñ bozuluvını «uquq terrorizmi» dep adlandırdı. Bu beyanatnı Saliyevadekabrniñ 21-nde, Kreml nezaretindeki Qırım Yuqarı mahkemesiniñ binası ögünde, oktâbrniñ 12-nde Bağçasarayda tutluıp alınğan Seyran Saliyev, Memet Belâlov ve Timur İbragimovnıñ apiste qaluv müddeti uzatılğan soñ beyan etti.
«Cemaatçılıq temsilcileri ve jurnalistlerniñ diqqatini yapılğan terrorğa (Qırımda – QA) çelp etmek isteyim. Qadı, FSB, «E» merkezi bizim qocalarımıznı tutıp alaraq, balalarımıznı babasız qaldırdı – işte bu bir terror. Olarnı İVS ve SİZOğa ağır hastalığı olğan qart adamalrnı oturtıp, ayatları telükege kirgen alğace tutalar - işte bu da terror. Olarnı mahkemege alıp keterek, bizim ballarnı aşsız-suvsız tutalar – işte bu da terror. Men er şeyni olğanı kibi aytam – bu qırımtatarlarğa qarşı yapılğan uquq terrorı. Bu yalıñız insan aqlarınıñ bozulması ya da repressiya degil de – bu devlet seviyesindeki terror», – dep beyan ete Mumine Saliyeva.
Oktâbrniñ 12-nde işğal altındaki Qırımda küç idaresiniñ hadimleri Bağçasaraynıñ altı sakini olğan Timur İbragimov, Marlen (Suleyman) Asanov, Memet Belâlov, Seyran Saliyev, Server Zekiryayev ve Ernest Ametovnı tevqif etken edi. FSB olarnı Rusiye ve ilhaq etilgen Qırımda yasaqlanğan «Hizb ut-Tahrir» azaları olğanında qabaatlay.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı dep saya. Advokat Emil Kürbedinovnıñ qayd etkenine köre, Rusiye uquqqoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleridir.
«Hizb ut-Tahrir» halqara islâm siyasiy teşkilâtı bütün musulman devletleriniñ islâm halifatına birleştirilmesini öz maqsadı olğanını ayta, amma olar, bu maqsatqa irişmek oğrunda terroristik usullarnı red ete ve Rusiyede adaletsizce taqip etilgenini aytalar. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etken edi.
