Munasip vesiqalarnıñ azırlanğanına ve muessisege yollanğanına baqmadan Rusiye Federal cezalarnı icra etüv hizmetiniñ (FSİN) idaresi «Veciye Kaşka işi» figurantı Asan Çapuhnıñ hastahanege keçirilüvini çañalata. Bunı dekabrniñ 20-sinde, advokat Ayder Azamatovnıñ sözlerine esaslanıp, «Qırım birdemligi» birleşmesi bildire.
Azamatovnıñ aytqanına köre, o, muvaqqat izolâtornıñ tıbbiy bölügi mudirinen suhbetleşkende mudir, Çapuhnıñ keçirilmesine dair vesiqalar endi üç künden berli Rusiye FSİNniñ Qırım boyunca idaresinde bulunalar, dedi.
«Aynı zamanda Qırım prokuraturası tarafından Asan Çapuhnıñ hastahanege yollanılmasına dair talabı artıq berildi, hastahaneden de sağlığınıñ teşkerilmesi içün qabul etilmesine dair razılıq bar. Yani, mudirniñ aytqanına köre, muvaqqat izolâtor onıñ hastahanege yollanılması içün bütün zarur olğan areketlerni yaptı, lâkin muvaqqat izolâtorğa bile belli olmağan sebepten dolayı yuqarıdaki maqam, uquqsız… ve belli olmağan hususlarğa esaslanıp, bir şey yapmay ve böylelikle Asan Çapuhnıñ sağlığı ve ayatı içün telüke doğura.
Bunıñ arfesinde qırımtatar areketiniñ faaliyetçisi Zair Smedlâyev, keçirgen insulttan soñ qırımtatar faaliyetçisi, «Veciye Kaşka işi» figurantı Asan Çapuhnıñ sağlıq vaziyeti pek ağır, dep bildirdi.
65 yaşlı Asan Çapuh muvaqqat izolâtorda mikroinsult keçirdi ve acele surette hastahanege yatqızılmaq kerek. Onıñ advokatı Ayder Azamatov, imayesi altında bulunğannıñ şeer hastahanesine keçirilmesini talap ete edi.
Noyabrniñ 23-nde kündüz Aqmescitte telükesizlik hadimleri bir grup qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Olar Türkiye vatandaşından «aqsız yerde hususan büyük miqdarda para talap etüv»de qabaatlanalar. Rusiye telükesizlik hadimleri tarafından yaqalanuvları esnasında qırımtatar milliy areketiniñ veteranı Veciye Kaşka yaramadı. Daa soñra qadınnıñ vefat etkeni belli oldı.
Noyabrniñ 24-nde Rusiyeniñ kontroli altında bulunğan Aqmescitteki Kyiv rayonı mahkemesi yaqalanğan qırımtatar faaliyetçilerini 2018 senesi yanvarniñ 15-ne qadar apiste qaldırdı.
