Rusiyeniñ kontroli altında bulunğan Qırım mahkemeleri bir kişilik piketlerde iştirak etken qırımtatarlarğa qarşı memuriy işlerni baqmağa devam etti. Bunı Qırım.Aqiqat muhbiri bildire.
Canköyde mahkeme bir kişilik piketlerniñ üç iştirakçisi – Ablâmit Ziyadinov, Rustem Ametov ve Ayder Zekeryayevge 15 biñ rublelik (7 biñ hrivnağa yaqın – QA) cöreme tayin etti. Daa ekisi – Ayder Suleymanov ve Remzi Kutuzovğa 10-ar biñ ruble (qararnen 4700 hrivna – QA) miqdarında cöreme yazıldı.
Aq-uquq qoruyıcısı Lütfiye Zudiyevanıñ aytqanına köre, «piketçi»lerden biri, Ayder Suleymanov, mahkemede, oña qarşı memuriy protokol tizilgende polis memurları oña tazyıq etkenlerini söyledi.
Zudiyeva: «O, sorğunı grajdan urbalı adam yapqanını söyledi. Suleymanovnı polis bölügine şahsiy maşinanen alıp kettiler. Onıñ, maşinağa oturmamaq aqqı bar edi. Ayder polis bölügine ketirilgen soñ advokatnıñ berilmesini talap etti ve buña qaba surette berilgen menfiy cevap aldı. İhtimal, polis hadimi Suleymanovnı, itiraf etmese cinaiy madde boyunca taqip etilecegi ile qorquza edi», – dep ikâye etti.
Ondan ğayrı o, «piketçiler»ge qarşı bir qaç protokol bir aydan ziyade vaqıt keçken soñ tizildi, bu ise qanunlarnıñ qaba bir bozuluvıdır, dep ilâve etti.
Aqmescit rayon mahkemesi ondan ğayrı qırımtatarlar Lemar Acigafarov ve Rustem Troşqa qarşı10-ar biñ rublelik cöreme tayin etti.
Dekabrniñ 18-nde Qırımda, daa evel tintüvler ve tevqiflerge cevaben bir kişilik piketlerge çıqqan qırımtatarlarğa qarşı 70-ke yaqın mahkeme oturışuvı ötkerildi. Faaliyetçilerge qarşı, tayin etilgen piket ötkerüv tertibiniñ bozulması munasebeti ile (Rusiyeniñ Memuriy tertip bozuv aqqında kodeksi, madde 20.2, 5-nci qısım) memuriy protokollar tizildi.
Mahkemeler, yarımadada Qırım musulmanlarnıñ tintüvleri ve tevqiflerine qarşı yapılğan bir kişilik piketlerniñ iştirakçilerine umumen 650 biñ ruble (qararnen 285 biñ hrivna – QA) miqdarında cöremeler tayin ettiler.
Mahkeme oturışuvları, cümleden, Aqmescit, Canköy, Aluşta, Suvdağ ve bunıñ kibi de İçki, İslâm-Terek, Qarasuvbazar ve Qurman rayonlarında ötkerildi. İçki işler nazirliginiñ Qırım boyunca ekspertiza merkezi tarafından «piketler bir maqsat, bir niyet ve umumiy teşkil etilüv ile birleştirileler» şeklinde çıqarılğan hulâsa, qabaatlav tarafınıñ esas delili olaraq qabul etilmekte.
