Kremlniñ kontroli altında bulunğan Qırım Yuqarı mahkemesi Bağçasaraydaki «Hizb ut-Tahrir işi» figurantları Ernes Ametov, Marlen Asanov ve Server Zekiryayevniñ advokatları bergen appelâtsiya şikâyetini baqıp olamadı. Bunı Qırım.Aqiqat muhbiri bildirdi.
Mahkeme oturışuvı eki saat keçikip başladı ve açıq rejimde keçe edi.
Dekabrniñ 7-sinde Kyiv rayonı mahkemesindeki apiste tutuv muddetiniñ uzatılması boyunca oturışuvda Emil Kurbedinovnıñ imayesi altında bulunğan Marlen Asanov terciman hizmetinden faydalana edi. Buña rağmen, birinci maqam mahkemesiniñ qararı qırımtatar tiline tercime etilmedi.
Advokat Emil Kurbedinov oturışuvdan soñ: «İmayem altında bulunğan şahıs birinci maqam mahkemesinde tercimannı talap etti. Faqat iş Yuqarı mahkemege berilgende (apiste bulunuv muddetiniñ uzatılması aqqında – QA) qarar tercime etilmedi. Marlen Asanovnıñ qoluna qırımtatar tiline tercime etilgen qarar berilmedi. Terciman da bugün ötkerilecek oturışuv aqqında haberdar etilmedi. Mahkeme, qararnı qırımtatar tiline tercime ettirsin dep, işni birinci maqam mahkemesine qaytarmağa qarar berdi», – dep añlattı.
Akem bugünki oturışuv esnasında, işniñ qaytarılması appelâtsiya şikâyetiniñ obyektiv surette baqıp çıqılmasına yardım etecek dep, qarar berdi. Advokatlar ve prokuror akemniñ qararına qol tuttılar.
Mahkemeniñ qararında: «Asanov, Ametov ve Zekiryayevge qarşı alıp barılğan işiniñ materialları, ekinci maqam mahkemesi tarafından baqılmasına keder etken hususiyetlerniñ yoq etilmesi içün birinci maqam mahkemesine qaytarılmaq kerekler», – denile.
Dekabrniñ 6-sında Aqmescitniñ Kyiv rayonı mahkemesi daa üç «Hizb ut-Tahrir işi» figurantı – Ernes Ametov, Marlen Asanov ve Server Zekiryayevqa apis müddetini martnıñ 9-na qadar uzattı. Bağçasarayda tevqif etilgen daa üç «Hizb ut-Tahrir işi»niñ figurantı – Seyran Saliyev, Memet Belâlov ve Timur İbragimovnıñ apis muddeti de martnıñ 9-na qadar uzatıldı.
İlhaq etilgen Qırımda oktâbrniñ 12-sinde Rusiye telükesizlik hadimleri Bağçasaraynıñ altı sakini – Timur İbragimov, Marlen (Suleyman) Asanov, Memet Belâlov, Seyran Saliyev, Server Zekiryayev ve Ernes Ametovnı tevqif etti. FSB olarnı Rusiye ve onıñ tarafından ilhaq etilgen Qırımda yasaqlanğan «Hizb ut-Tahrir» teşkilâtınıñ azaları olğanında qabaatlay.
«Hizb ut-Tahrir işi» boyunca tevqif ve mahküm etilgen Qırım sakinleriniñ advokatları, olarnıñ taqip etilüvi diniy alâmetine köre yapıla, dep sayalar. Advokat Emil Qurbedinov, Rusiye uquqqoruyıcı organları tarafından bu iş boyunca taqip etilgenler esasen qırımtatarlar ve olarnen birlikte İslâm dinini kütken ukrainler, ruslar, tacikler, azerbaycanlar ve diger etnik gruppalarğa ait Qırım sakinleri olğanını qayd ete.
