Dekabrniñ 19-nda BMT (OON) Baş Assambleyası Qırımda insan aqları boyunca rezolütsiya qabul etti.
Rey berilgen soñ, vesiqanıñ qabul etilmesine 70 devlet qol tuttı, 26-sı – qarşı çıqtı ve 76-sı – bitaraf oldu. Rezolütsiyağa qarşı çıqqanlar arasında Ermenistan, Beyazrusiye, Rusiye, Suriye, Zimbabve ve başqaları bar.
Vesiqada Rusiye BMT Halqara mahkemesiniñ Qırımda qırımtatar halqı Milliy Meclisiniñ yasaqlanmasınen bağlı qararnıñ lâğu etilmesi ve yarımadada ukrain ve qırımtatar tillerinde tasil berilüvinen bağlı muvaqqat tevsiyelerniñ temin etilmesi talap etile.
Noyabrniñ 14-nde New-Yorkta, BMT (OON) Baş Assambleyasınıñ oturışuvında, ilhaq etilgen Qırımda insan aqları boyunca yañartılğan rezolütsiyanıñ leyhası qabul etilgen edi.
Ukraina prezidenti Petro Poroşenko Üçünci komitetniñ Qırımda insan aqlarınıñ vaziyeti boyunca BMT (OON) Baş Assamblayesınıñ küçlendirilgen rezolütsiya leyhasını qabul etüv qararını alğışladı ve onıñ Qırımnı azat etüv meselesinde halqara cemaatçılıq içün Rusiye akimiyetine berilgen bir signal dep adlandırdı.
Qırımnıñ rusiyeli yolbaşçısı Sergey Aksönov Qırımnen bağlı işbu rezolütsiya leyhasını «Rusiyege qarşı qullanılğan gibrid silâ» dep adlandırğan edi.
Halqara teşkilâtlar Qırımnıñ istilâsı qanunsız olğanını tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey.Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü olaraq qabul etti.
