Dekabrniñ 19-nda Kremlniñ kontroli altında bulunğan Canköy rayon mahkemesi, yarımadada qırımtatarlar, musulmanlarnıñ tintüvleri ve tevqiflerine qarşı yapılğan bir kişilik piketlerniñ iştirakçilerine cöremeler tayin etmege devam ete.
Bunı «Qırım birdemligi» cemiyet birleşmesi bildire.
Olarnıñ malümatınna köre, saat 13:00-ge (Kyivde 12:00-ge) qadar mahkeme eki qırımtatar faaliyetçisi – Ayder Zekeryayev ve Ablâmit Ziyadinovğa cöremeler tayin etti. Olar 15-er biñ ruble (qararnen 7 biñ hrivna – QA) tölemek mecburlar.
Dekabrniñ 19-nda Canköy mahkemesi bir kişilik piketlerniñ iştirakçilerini mesuliyetke çeküv aqqında daa üç qararnı ve Aqmescit mahkemesi – daa eki qararnı baqıp çıqmaq niyetindeler.
Dekabrniñ 18-nde Qırımda, daa evel tintüvler ve tevqiflerge cevaben bir kişilik piketlerge çıqqan qırımtatarlarğa qarşı 70-ke yaqın mahkeme oturışuvı ötkerildi. Faaliyetçilerge qarşı, tayin etilgen piket ötkerüv tertibiniñ bozulması munasebeti ile (Rusiyeniñ Memuriy tertip bozuv aqqında kodeksi, madde 20.2, 5-nci qısım) memuriy protokollar tizildi.
Mahkemeler, yarımadada Qırım musulmanlarnıñ tintüvleri ve tevqiflerine qarşı yapılğan bir kişilik piketlerniñ iştirakçilerine umumen 650 biñ ruble (qararnen 285 biñ hrivna – QA) miqdarında cöremeler tayin ettiler.
Mahkeme oturışuvları, cümleden, Aqmescit, Canköy, Aluşta, Suvdağ ve bunıñ kibi de İçki, İslâm-Terek, Qarasuvbazar ve Qurman rayonlarında ötkerildi. İçki işler nazirliginiñ Qırım boyunca ekspertiza merkezi tarafından «piketler bir maqsat, bir niyet ve umumiy teşkil etilüv ile birleştirileler» şeklinde çıqarılğan hulâsa, qabaatlav tarafınıñ esas delili olaraq qabul etilmekte.
Qırımda oktâbrniñ 14-nde, Rusiye tarafından ilhaq etilgen yarımadada telükesizlik hadimleriniñ qırımtatarlarğa, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
