Link açıqlığı

Saatnıñ esas haberi

Çubarov: Qırımda piket iştirakçileriniñ mahkemesi qanunsız şekilde halqara aq-uquq normalarını boza


Qırımtatar Milliy Meclisiniñ reisi Refat Çubarov, dekabrniñ 18-nde, Qırımda teşkil etilgen tintüv ve insanlarnıñ tutıp alınuvına qarşı bir kişilik piketlerge çıqqan qırımtatarlarğa qarşı teşkil etilgen mahkemeler, «halqara uquqnıñ temel normalarına nisbeten kösterilgen açıq pervasızlıq», dep saya.

Bu aqta Çubarovnıñ Facebook saifesinde derc etilgen beyanatta söz yürsetile.

«BMTnıñ Baş Assambleyası insan aqları boyunca qararınıñ baqılması arfesinde qırımtatarlar üstünden Rusiye ilhaq etken Qırımda kütleviy mahkeme cereyanlarını tayin etkeni, qırımtatarlarnıñ işğalcilerge boysunmağan iradesini bastırmaq maqsadınen bir sırada, o halqara uquqnıñ başlanğıç normalarına, bütün halqara teşkilâtlar, şu cumleden BMTnıñ faaliyeti içün açıq ve insanğa qarşı itibarsızlıq yapqanını numayış ete», – denilmekte beyanat metininde.

Qırımtatarlarnıñ vekâletli organınıñ reberi «işğal etilgen Qırımda rusiyeli basqıncılar tarafından taqip etilgen er bir qırımtatar ve ukrainlerge qol tutqanını bildirerek, halqara cemaatçılıq, çeşit devletlerniñ reberleri ve siyasetçilerniñ Rusiyeniñ Ukrainağa qarşı başlatqan silâlı tecavuzını bitirmek ve tez vaqıtta işğalden soñ Qırımğa qanunsız yerleştirilgen Rusiye vatandaşlarını, ordusını çıqarmasına mecbur etüvni küçlendirmege devam etecek».

Çubarov ayrıca Ukraina yolbaşçılarını «Qırımnıñ tez vaqıtta azat etilmesi içün ukrain cemiyetini birleştirmesine» çağıra.

Dekabrniñ 18-nde, Qırımda daa evel tintüv ve insanlarnıñ tutıp alınuvına qarşı bir kişilik piketlerge çıqqan qırımtatarlarnen bağlı 70-ten ziyade mahkeme keçirile. Faallerge piket keçirüv tertibini bozğanlarınen içün (Rusiye Uquq bozuv Memuriy Kodeksiniñ 20.2 madddesiniñ 5 qısmı) memuriy protokollar tizilgen edi.

Mahkeme oturışuvları hususan Aqmescit, Canköy, Aluşta, Sudaq, ayrıca İçki, İslâm-Terek, Qarasuvbazar ve Qurman rayonınlarında da keçecek. Qabatlağan tarafnıñ esas isbatı Qırım MVDsi ekspert merkeziniñ «piketler bir maqsat, fikirnen birleştirilgen ve umumiy teşkil etildi» degen ekspertizasına bazanmaqta.

Oktâbrniñ 14-nde Qırımda, Rusiye tarafından ilhaq etilgen yarımadada küç idaresi hadimleri tarafından qırımtatarlar ve musulmanlarğa nisbeten yapılğan repressiyalarğa qarşı bir sıra bir kişilik piketler keçirilgen edi.

Rusiye işğalinden soñ, Qırımda mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.

XS
SM
MD
LG