Dekabrniñ 18-nde, aqşam, Moskva ve Sankt-Peterburgda Rusiyeniñ «Strategiya-18» faaliyetçileri Qırımda Rusiye telükesizlik hadimleriniñ repressiyalarına qarşı bir kişilik mitinglerge qatnaşqan qırımtatar faaliyetçilerine qol tutmaq içün areketler yapalar.
Bunı, Qırım.Aqiqat içün bergen izaatında bu areketlerni teşkil etkenlerden biri, Vera Lavreşina söyledi.
«Bugün aynıñ 18-nci künü ve bu sebepten «Strategiya-18»niñ adet üzre yapılğan areketi bar. Moskva ve Piter qırımtatarlarnıñ azatlığı ve mustaqilligi içün, Qırımda olarnıñ taqip etilmesine qarşı çıqa. Biz, bugün mahkemeleri ötkerilgen bir kişilik piketlerniñ iştirakçileri ile birdemlik areketlerini yapamız… Biz qanunsızlıqnıñ toqtatılmasını talap etemiz», – dedi o.
Onıñ aytqanına köre, Sankt-Peterburgda areketler «şimdilik qarşılıqsız» keçe.
Dekabrniñ 18-nde Qırımda, daa evel tintüvler ve tevqiflerge cevaben bir kişilik piketlerge çıqqan qırımtatarlarğa qarşı 70-ke yaqın mahkeme oturışuvı ötkerilmekte.
Faaliyetçilerge, tayin etilgen piket ötkerüv tertibiniñ bozulması munasebeti ile (Rusiyeniñ Memuriy tertip bozuv aqqında kodeksi, madde 20.2, 5-nci qısım) memuriy protokollar tizildi. Olarğa qarşı 10 biñden 20 biñ rublege qadar (4700-den 9400 hrivnağa qadar – QA) cöreme ya da mecburiy iş cezası tayin etile bileler.
Mahkeme oturışuvları, cümleden, Aqmescit, Canköy, Aluşta, Suvdağ ve bunıñ kibi de İçki, İslâm-Terek, Qarasuvbazar ve Qurman rayonlarında ötkerilmekte. İçki işler nazirliginiñ Qırım boyunca ekspertiza merkezi tarafından «piketler bir maqsat, bir niyet ve umumiy teşkil etilüv ile birleştirileler» şeklinde çıqarılğan hulâsa, qabaatlav tarafınıñ baş delili olaraq qabul etilmekte.
Qırımda oktâbrniñ 14-nde, Rusiye tarafından ilhaq etilgen yarımadada telükesizlik hadimleriniñ qırımtatarlarğa, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi.
Rusiyeniñ muhalif faaliyetçileri muntazam surette siyasiy mabüslerni azat etmek, Rusiyeniñ Ukrainağa qarşı tecavüzini toqtatmaq, Qırımnıñ işğaline soñ qoymaq talaplarınen barışıqlı piketler ve tedbirlerge çıqalar.
Sankt-Peterburg ve Moskvanıñ faaliyetçileri, qırımtatarlarnıñ 1944 senesi mayıs 18-nde sürgün etilüvi hatırasına «Strategiya-18» dep adlandırılğan muddetsiz areket içün birleştiler. İlhaq etilgen Qırımdaki vaziyetni tanıtmaq, Rusiye cemaatçılığına insan aq-uquqları ve ürriyetleriniñ bozuluvı vaqiaları aqqında haber bermek içün faaliyetçiler er aynıñ 18-nci künü şeerniñ soqağına çıqalar.
