Kremlniñ kontroli altında bulunğan Qırım mahkemeleri dekabrniñ 18-nde yapılğan oturışuvlarında, Qırımda Rusiye telükesizlik hadimleriniñ repressiyalarına narazılıq köstermek içün bir kişilik piketlerge çıqqan qırımtatar faaliyetçilerine qarşı birinci cöremelerni tayin ettiler.
«Qırım birdemligi» birleşmesi bildirgeni kibi, Qarasuvbazar rayon mahkemesi Ayder Abibullayev ve Eldar Emir-Useyinovğa qarşı 10-ar biñ ruble (4700-ge yaqın hrivna – QA) miqdarında cöremeler tayin ettiler.
İçki rayon mahkemesinde 10 biñ rublelik cöreme Server Seytibramovğa, aynı miqdardaki cöreme İslâm-Terek rayon mahkemesinde Tair Umerovğa qarşı tayin etildi. Aqmescit rayon mahkemesi Rustem Emir-Useyinovnıñ işi boyunca oturışuvnı dekabrniñ 26-sına avuştırdı.
Dekabrniñ 18-nde Qırımda, daa evel tintüvler ve tevqiflerge cevaben bir kişilik piketlerge çıqqan qırımtatarlarğa qarşı 70-ke yaqın mahkeme oturışuvı ötkerilmekte.
Faaliyetçilerge, tayin etilgen piket ötkerüv tertibiniñ bozulması munasebeti ile (Rusiyeniñ Memuriy tertip bozuv aqqında kodeksi, madde 20.2, 5-nci qısım) memuriy protokollar tizildi. Olarğa qarşı 10 biñden 20 biñge qadar ruble (4700-den 9400-ge qadar hrivna – QA) miqdarında cöreme ya da mecburiy işler cezası tayin etile bileler.
Mahkeme oturışuvları, cümleden, Aqmescit, Canköy, Aluşta, Suvdağ ve bunıñ kibi de İçki, İslâm-Terek, Qarasuvbazar ve Qurman rayonlarında ötkerilmekte. İçki işler nazirliginiñ Qırım boyunca ekspertiza merkezi tarafından «piketler bir maqsat, bir niyet ve umumiy teşkil etilüv ile birleştirileler» şeklinde çıqarılğan hulâsa, qabaatlav tarafınıñ esas delili olaraq qabul etilmekte.
Qırımda oktâbrniñ 14-nde, Rusiye tarafından ilhaq etilgen yarımadada telükesizlik hadimleriniñ qırımtatarlarğa, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi.
