Dekabrniñ 18-nde Kremlniñ kontroli altında bulunğan Qırım mahkemeleri, tintüvler ve tevqiflerge qarşı çıqıp, bir kişilik piketlerde iştirak etken qırımtatar faaliyetçilerge qarşı qabaatlav qararlarını qabul etmege devam eteler. «Qırım birdemligi» birleşmesi bildirgeni kibi, Qarasuvbazarda Ruslan Umerov, Eldar Emir-Useyin ve Ayder Abibullayevge 10-ar biñ ruble miqdarında (4700 hrivnağa yaqın – QA) cöreme yazıldı.
Suvdağda mahkemeci Mihail İvanov, Camadin Ziyadinovğa qarşı 10 biñ ruble cöreme tayin etmek qararını berdi. Mahkemeci Yevgeniy Rıkov aynı miqdardaki cöremeni Tair İbraimovğa yazdırdı.
İçki qasabasında mahkemeci Yuliya Petrova 10 biñ rublelik cöremeni Server Seytibramov üstüne yazdırdı. Canköyde 10 biñ rublelik cöreme Nariman Ametovğa ve aynı miqdardaki cöremeni Aqmescitteki Jeleznodorojnıy rayonı mahkemesi Ali Muratovğa tayin etti.
Dekabrniñ 18-nde Aqmescitte, daa evel tintüvler ve tevqiflerge qarşı bir kişilik piketlerge çıqqan qırımtatarlarğa qarşı 70-ke yaqın mahkeme oturışuvı ötkerilmekte. Faaliyetçilerge qarşı, tayin etilgen piket ötkerüv tertibiniñ bozulması içün (Rusiyeniñ Memuriy tertip bozuv aqqında kodeksi, madde 20.2, 5-nci qısım) memuriy protokollar tizildi.
Mahkeme oturışuvları, cümleden, Aqmescit, Canköy, Aluşta, Suvdağ ve bunıñ kibi de İçki, İslâm-Terek, Qarasuvbazar ve Qurman rayonlarında ötkerileler. Qabaatlav tarafınıñ baş delili, İçki işler nazirliginiñ Qırım boyunca ekspert merkezi tarafından berilgen «piketler bir maqsat, bir niyet ve umumiy teşkil etilüv ile birleştirileler» degen ekspertizasıdır.
Qırımda oktâbrniñ 14-nde, Rusiye tarafından ilhaq etilgen yarımadada telükesizlik hadimleriniñ qırımtatarlarğa, musulmanlarğa qarşı repressiyalarına narazılıq köstermek maqsadınen bir sıra bir kişilik piketler ötkerildi.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
