Qırım Muhtar Cumhuriyeti Prokuraturası, Qırımtatar Milliy Meclisi reisiniñ muavini İlmi Umerov ve Qırım jurnalisti Nikolay Semenağa qarşı mahkeme protsesslerinde iştirak etken muessiseniñ sabıq hadimi Oleg Sarginovnıñ qıdırılğanını resmen ilân etti.
Bu hususta, prokuraturanıñ matbuat hizmeti tarafından Qırım.Aqiqatnıñ malümat talabına berilgen cevabında aytıla.
Vesiqada bildirilgeni kibi, QMC Prokuraturası mahkemeden evelki mahsus tahqiqat neticesinde mahkemege Oleg Sarginovğa qarşı qabaatlav aktını yolladı.
Açıq menbalarda Qırım Muhtar Cumhuriyeti Prokutarurasınıñ sabıq hadimi tarafından bu hususta izaat berilmedi.
2017 senesiniñ iyun ayında muessise mahkemege Qırımnıñ sabıq prokurorı Sergey Nânçurğa qarşı qabaatlav aktını yolladı.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri buña qarşı bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
