Tıbbiyet hadimleri, dekabrniñ 15-nde İsrail telükesizlik hadimleri ile çatışmalar esnasında dört filistinli elâk oldı, 160-ı yaralandı, dep bildirdiler. Çatışmalar, AQŞ prezidenti Donald Trampnıñ, Qudüsni İsrailniñ paytahtı tanımaq qararı ile alâqalı.
Azatlıq Radiosı bildirgeni kibi, zararlanğanlarnıñ çoqusı Ğazzeden. Anda biñlerce filistinliler pekitilgen qora artından İsrail askerlerini taş boranına tuttı. Tıbbiyet hadimleriniñ bildirgenine köre, anda narazılıq köstergenlerniñ ekisi elâk oldı. Olardan biri saqatlar telekesinde (arabaçığına) edi. Daa 150 kişi yaralandı.
Ondan ğayrı Ğarbiy Şeriada (Ürdün özeniniñ ğarbiy sailinde) İsrail telükesizlik hadimleriniñ qurşun atışı neticesinde narazılıq köstergenlerniñ ekisi elâk oldı ve daa 10 kişi yaralandı.
Dekabrniñ 6-sında Amerika Qoşma Ştatlarınıñ prezidenti Donald Tramp, AQŞniñ Qudüsni İsrailniñ paytahtı olaraq resmen tanığanını ilân etip, AQŞ elçiligini Tel-Avivden anda avuşturmağa vade etti.
Trampnıñ bu adımı filistinliler ile olarnıñ arap ittfaqdaşları ve bunıñ kibi de Ğarp devletleri tarafından tenqit etildi.
Qudüsniñ statusı, İsrail-Filistin çatışmasınıñ er bir tarafı içün tesirli meseledir. Filistinliler Şarqiy Qudüsni, ileride qurulacaq devletleriniñ paytahtı olmaq kerek, dep sayalar.
BMTniñ 1947 senesine ait, o zaman Britaniya mandatı altında bulunğan Filistinniñ toprağında yeudi ve arap olaraq eki devletni qurmaq planı boyunca Qudüs, BMTniñ idaresi altında mahsus bir halqara rejimi ile ayrı bir birlem olmaq kerek edi.
Aqiqatta ise 1948 senesinde İsrail birinci Arap-İsrail cenkiniñ neticeleri boyunca şeerniñ ğarbiy qısmını kontroli altına aldı ve 1949 senesinde Qudüsni öz paytahtı ilân etti. Şarqiy Qudüs o zaman Ürdün tarafından işğal etildi. İsrail 1967 senesi Altı künlük cenki esnasında Şarqiy Qudüsni de Eski şeer ile beraber zapt etti ve daa soñra, bu territoriyanı ilhaq etkenini ilân etip, bütün Qudüs onıñ bolünmez paytahtı olğanını bildirdi.
Halqara cemaatçılığı 1947 senesiniñ planı esasında Qudüsniñ İsrailge ait olğanını, hususan Şarqiy Qudüsniñ İsrail tarafından ilhaq etilgenini ve bütün şeerniñ ülkeniñ paytahtı ilân etilgenini tanımay. Asılında bütün devletlerniñ ve şu cümledeñ AQŞnıñ elçilikleri Tel-Avivde buluna.
