Link açıqlığı

Saatnıñ esas haberi

Oleg Zubkov: «Tavrida» trassasınıñ qurucıları Qırım ekologiyasına milliardlarca rublelik zarar ketirdiler


«Tavrida» trassasınıñ qurulması esnasında ğayıp etilgen orman şeriti, 2017 senesi
«Tavrida» trassasınıñ qurulması esnasında ğayıp etilgen orman şeriti, 2017 senesi

Qırım iş adamı, Yaltadaki «Skazka» ayvanat bağçası ve «Tayğan» arslanlar parkınıñ saibi Oleg Zubkov, «Tavrida» trassasınıñ qurucıları Qırım ekologiyasına milliardlarca rublelik zarar ketirdiler, dep iddia ete.

Onıñ aytqanına köre, «Tavrida» trassasınıñ leyhası, uyğunlaştırılması ve qurulması esnasında «hususan büyük miqdarda ekologik cinayet işlendi». Bunı Zubkov dekabrniñ 16-sında öz blogunda yazdı.

«Rusiyeniñ «Qırmızı kitabı»nda olğan Qırım çamı, glediçiya, ceviz terekleri, eskemçek, qaysı terekleri ve diger 40-80 yıllıq tereklerniñ saçılğan yerleri tübü-tamırınen yoq etildi. Bu orman şeritleriniñ yoq etilmesinden umumiy zarar, yalıñız paranen ölçengende, milliardlarca ruble teşkil etecek. Yoqsa Qırım çamınıñ 50 yaşına kelip yetişken teregi bir qaç yüz biñ rubleden az tura dep tüşüngenler barmı­­­­?», – denile bildirüvde.

Zubkov trassasınıñ leyhasını yapqanlarnı pervasız, işten añlamağan adamlar dep, yarımadada orman şeritlerini Qırım sakinleriniñ bundan evelki nesilleri saçqanını hatırlattı.

Qırım iş adamı: «Bu orman şeritleriniñ yalıñız estetik degil, aynı zamanda büyük bir ameliy emiyeti bar edi. Olar, bazan maşinalarnı yoldan çetke itep avdarğan qasırğalarnıñ tesirini eksilte, yelge tarlalardan qarnı alıp ketmege bermey, quşlar ve ayvanlar içün sığınaq ola ve yolcular da olarda raatlana bile ediler. Güllegen qaysı ve eskemçek terekleri er bir yoldan keçkeniniñ gözüni quvandıra ediler», – dep qayd etti.

«Tayğan» trassasını qurğan qurucılıq şirketiniñ vekilleri şimdilik Zubkovnıñ sözlerine izaat bermediler.

Qırımda «Tavrida» avtomobil yolunıñ quruluvı başlağanı aqqında heber bu yılnıñ mayıs ayında bildirildi. «Tavrida» trassasınıñ qullanuvğa teslim etilüvi 2018 senesine planlaştırıla edi, lâkin Rusiye kontroli altında bulunğan Qırım avtomobil yolları hizmetiniñ yolbaşçısı Aleksandr Mohna, qurucılıq muddetiniñ eki yılğa uzatılğanını bildirdi.

2017 senesi ağustosında Rusiye baş naziri Dmitriy Medvedev, «Tavrida»nıñ qurucılığına 14,36 milliard rubleniñ (qararnen 6,5 milliard hrivnanıñ – QA) ayırılacağını közde tutqan büdjetniñ 2018 senes ile 2019-2020 senelerine masrafları boyunca buyruqnı imzalağanını bildirdi.

XS
SM
MD
LG