Ekimler, noyabrniñ 23-nde ilhaq etilgen Aqmescitte yaqalanğan qırımtatar faaliyetçisi Bekir Degermencini, esas olaraq, ilâclar tesirindeki tıbbiy yuquda tutalar. Bunı Qırım.Aqiqat muhbirine faaliyetçiniñ apayı Aliye Degermenci bildirdi.
«Bekirniñ sağlıq vaziyeti ağır, amma stabil. O eşite, başını sallay, lâkin laf etip olamay, çünki oña intubatsiya yapıldı (nefes almasını temin etmek içün nefes borusı içine mahsus boru keçirildı – QA). Oña areket etmege olmay, amma ekim, bugün oña, mahsus zond keçirip, aş bermege areket eteceklerni söyledi», – dep bildirdi o.
Aliye Degermenci, Bekir Degermenci yatqan hastahane odasına kimseni yibermegenlerini söyledi. Qapısı yanında üç saqçı qaravullay.
Aq-uquq qoruyıcıları, Qırımda muntazam surette tıbbiy yardımnıñ kösterilmemesi ve azatlıqtan marum etüv yerlerindeki insaniyetsiz şaraitler mabüslerniñ bedeniy azabına ketire ve olümlerine sebep ola bileler
Qırım aq-uquq qoruyıcı grubu, dekabrniñ 14-nde ilân etken yarımadadaki vaziyetniñ talilinde, Rusiye akimiyeti «eziyetlev, insaniyetsiz munasebet kösterüv ve olarğa musaviy tanılğan tıbbiy yardımnıñ qastlı olaraq kösterilmemesi tecribelerini deral toqtatmaq» kerek, dep bildire.
Dekabrniñ 14-nde «Veciye Kaşka işi» figurantları Bekir Degermenci ve Asan Çapuhnıñ advokatları, imayeleri altında bulunğanlarğa tıbbiy yardımnıñ kösterilmesini temin etmegen muvaqqat izolâtornıñ hadimlerine qarşı Kremlniñ kontroli altında bulunğan Qırım prokuraturasına şikâyet yazdılar.
Bekir Degermenci, dekabrniñ 14-ne keçer gecesinden başlap, pek ağır vaziyette reanimatsiya bölüginde buluna.
