Link açıqlığı

Saatnıñ esas haberi

Esli başlı faaliyetçi Server Karametovnıñ cöremesi «Qırım marafonı» çerçivesinde tölendi


Server Karametov
Server Karametov

Tünevin, dekabrniñ 14-nde Eski Qırımda «Qırım marafonı» hayriye cemiyet areketiniñ çerçivesinde esli başlı qırımtatar faaliyetçisi Server Karametovnıñ 10 biñ ruble miqdarındaki cöremesi tölendi. Cöreme tünevin, dekabrniñ 14-nde tölendi, dep bildire Qırım.Aqiqat muhbiri.

Kremlniñ kontroli altında bulunğan ilhaq etilgen Qırımnıñ Yuqarı mahkemesi sentâbrniñ 28-nde esli başlı qırımtatar faaliyetçileri Server Karametov ve Yarikul Davlatov üstüne yazılğan cöremelerni değiştirmeyip qaldırdı.

2017 senesi ağustosında Kremlniñ kontroli altında bulunğan Qırımnıñ Jeleznodorojnıy rayonı mahkemesi Karametov ve Davlatovğa 10 biñ ruble (4,3 biñ hrivnağa yaqın – QA) miqdarında cöreme tayin etti.

76 yaşlı qırımtatar faaliyetçisi Server Karametov qırımtatar liderlerinden biri olğan Ahtem Çiygozğa qol tutmaq içün ötkergen bir kişilik miting içün Aqmescitte ağustosnıñ 8-nde yaqalanğan edi. Oña qarşı eki memuriy protokol tizildi. Biri – «bir kişilik mitingler ötkerilmesiniñ tertibini bozuv içün», ekincisi – «polis hadimlerine qarşılıq kösterüv içün».

Ağustosnıñ 9-nda Kremlniñ kontroli altında bulunğan Aqmescitteki Jeleznodorojnıy rayonı mahkemesi oña «polis hadimlerine qarşılıq kösterüv içün» 10 kün memuriy apis cezasını berdi. Karametov ağustosnıñ 19-nda azat etildi.

Ağustosnıñ 14-nde Aqmescitte, daa evel tevqif etilgen esli başlı qırımtatar faaliyetçisi Server Karametovğa qol tutmaq maqsadınen bir kişilik piketler yapıldı. Rusiye telükesizlik hadimleri mitingge çıqqanlarnı yaqalay edi. Olarnıñ arasında Yarikul Davlatov da bar edi.

İyulniñ 31-nde «Qırım birdemligi», yarımadada siyasiy mabüsler ve vatandaş faaliyetçilerine qol tutmaq maqsadınen «Qırım marafonı» adı altında para toplanğanını ilân etti. Tedbir teşkilâtçılarınıñ niyetine köre, «pervasız olmağanlarnıñ birdemligi»ni köstermek içün paralarnı 10 Rusiye rublesi (qararnen 4 hrivna) qıymetinde maden aqçalar ile topladılar.

XS
SM
MD
LG