«Veciye Kaşka işiniñ» figurantı Asan Çapuhnıñ, Aqmescitniñ bir de-bir hastahanesine keçirilmesi planlaştırıla, dep haber ete dekabrniñ 15-nde, Qırım uquqqorçalayıcı gruppası advokat Ayder Azamatovqa esaslanaraq.
Azamatov iddia etkenine köre, advokatlar SİZO ve tibbiy bölükke muracaat etkenlerinden soñ, Asan Çapuhnı ekimler baqqan olsa da, onıñ sağlığı eyileşmegen.
«O, alâ daa özü areket etip olamay, ne raat nefes, ne de laf etip ola, sol omuzı, qolu ve ayağı alâ daa raat areket etip olamay», – dep bidire Qırım uquqqorçalayıcı gruppası advokatnıñ sözlerini.
Azamatovnıñ sözlerine köre, Asan Çapuhnıñ yaqın künlerde hastahanege keçirilecegine söz bergen ekenler.
«Veciye Kaşka işiniñ» figurantları Bekir Degermenci ve Asan Çapuhnıñ advokatları Kreml nezaretindeki Qırım prokuraturasına olarnıñ imayesi altındaki şahıslarğa SİZO hadimleri tibbiy yardım kösterilmemeri sebebinden şikâyet yollağan ediler.
Bekir Degermenci dekabrniñ 14 gecesinden berli ağır alda reanimatsiya bölüginde bulunmaqta.
Noyabrniñ 23-nde kündüz Aqmescitte telükesizlik hadimleri bir gruppa qırımtatarlar – Kâzim Ametov, Asan Çapuh, Ruslan Trubaç ve Bekir Degermencini tutıp aldı. Olar Türkiye vatandaşından «aqsız yerde hususan büyük miqdarda para talap etüv»de qabaatlana. Rusiye telükesizlik hadimleri tarafından tutuluvları esnasında qırımtatar milliy areketiniñ veteranı Veciye Kaşka yaramağan edi. Daa soñra qadınnıñ vefat etkeni belli oldı.
Noyabrniñ 24-nde Rusiyeniñ nezaretindeki Aqmescitniñ Kiyev rayon mahkemesi tutulıp alınğan qırımtatar faallerini 2018 senesi yanvarniñ 15-ne qadar apiste qaldırğan edi.
Rusiye işğalinden soñ Qırımda mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
