Ukraina Tış işleri naziri Pavlo Klimkin ABD ziyaret etkende, siyasiy sebeplerden dolayı Qırım ve Rusiyede tutulğan ukrainlerge çetel ekimleriniñ kirsetilmesi kerekliginen bağlı meseleni köterdi.
Bu aqta Klimkin dekabrniñ 15-nde Twitterde bildire.
«Umerov, Grib, Klıh, Veciye Kaşka, şimdi de Degermenci – insanlarnı tam manada qıynap taşlay ve ölümge yetkizeler. New-Yorkta partnörlarımıznen Rusiyede qanunsız şekilde tutulmaqta olğan ukrainlerniñ yanına çetel ve ukrain ekimlerniñ kirsetilüvinen bağlı mesele aqqında laf etem», – dep qayd ete Pavlo Klimkin.
Bundan evel cuma künü ukrain tış siyaset idaresiniñ spikeri Maryana Betsa, Ukraina Tış işleri nazirligi (MİD) dekabrniñ 14-nden berli reanimatsiyada yatqan qırımtatar faali Bekir Degermencige acele tibbiy yardım kösterilmesini talap etkeni aqqında haber etken edi.
Bekir Degermenci dekabrniñ 14 gecesinden berli ağır alda reanimatsiya bölüginde bulunmaqta.
Noyabrniñ 23-nde kündüz Aqmescitte telükesizlik hadimleri bir gruppa qırımtatarlar – Kâzim Ametov, Asan Çapuh, Ruslan Trubaç ve Bekir Degermencini tutıp aldı. Olar Türkiye vatandaşından «aqsız yerde hususan büyük miqdarda para talap etüv»de qabaatlana. Rusiye telükesizlik hadimleri tarafından tutuluvları esnasında qırımtatar milliy areketiniñ veteranı Veciye Kaşka yaramağan edi. Daa soñra qadınnıñ vefat etkeni belli oldı.
Noyabrniñ 24-nde Rusiyeniñ nezaretindeki Aqmescitniñ Kiyev rayon mahkemesi tutulıp alınğan qırımtatar faallerini 2018 senesi yanvarniñ 15-ne qadar apiste qaldırğan edi.
Rusiye işğalinden soñ Qırımda mustaqil jurnalistler, cemaat ve qırımtatar milliy areketiniñ faalleri, qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirilmege başladı.
