Qırım.Aqiqat, Rusiye prezidenti Vladimir Putinniñ dekabrniñ 14-nde neticelev matbuat konferentsiyası esnasında, sovet akimiyeti Qırımnı Ukrainağa qanunsız berdi, ve yarımadanıñ sakinleri öz seçimini yaptı, dep iddia etkenini bildirdi.
Putin: «(20-nci asırnıñ – QA) 22-23-24-nci yıllarında bolşevikler neçündir, tarihiy qısmına bitişik olğan topraqlar yañı qurulğan Ukraina cumhuriyetine kirsetilmek kerekler, dep qarar berdiler. Qara deñiz boyu anda ketti, Ekinci Cihan cenkinden soñ ğarbiy vilâyetler, 1954 senesinde ise, o zaman cariy olğan ve RSFSR Yuqarı şurasınıñ razılığını talap etken qanunlarnı bozup, Qırımnı alıp, anda berdiler. Qarar ise Yuqarı şurasınıñ prezidiumı tarafından berilgen edi. Ondan ziyade bir şey aytıp oturmaycam, Qırımnıñ halqı öz taqdirini nasıl tayın etken olsa, öyle tayın etti. Biz bunı başımızdan keçirirmiz», – dedi.
Daa soñra o, Kyiv ve Moskva «Ukraina ve Rusiye içün neler elverişli ve neler elverişsiz olğanını beraber tüşünmek kerekler», dep ilâve etti.
Rusiyede perzident ya da baş nazir kürsüsinde 1999 senesinden berli oturğan Putin dekabrniñ 6-sında, 2018 senesi prezident saylavına da qatılacağını ilân etti.
Rusiye prezidentiniñ saylavını 2018 senesi martnıñ 18-nde – Qırım ilhaqınıñ yıllığında yapmaq planlaştıralar. Daa evel saylav kününiñ başqa künge avuştırılması boyunca munasip qanun, Rusiyeniñ Devlet duması ile Fedratsiya Şurası tarafından tasdiqlanıp, Rusiye prezidenti Vladimir Putin tarafından imzalandı.
Halqara teşkilâtları Qırımnıñ işğali ve ilhaqını qanunsız tanıp, Rusiyeniñ areketlerini taqbih ettiler. Ğarp ülkeleri bir sıra iqtisadiy sanktsiyalar qullandı. Rusiye, yarımadanı işğal etkenini red etip, oña «tarihiy adaletniñ tiklenmesi», dey.Ukrainanıñ Yuqarı Radası 2014 senesi fevralniñ 20-sini, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
