Ukraina aq-uquq qoruyıcıcları, Qırımda mevcüt olğan mabüslerge tıbbiy yardım kösterüv şartları, olarnıñ sağlığı ve ayatları içün telükelidir, dep iddia eteler. Bu, dekabrniñ 14-nde yarımadadaki vaziyetniñ talilini ilân etken Qırım aq-uquq qoruyıcı grubu mutehassıslarınıñ hulâsasıdır.
Bildirüvde: «İnsaniyetsiz munasebet kösterüv ve mabüslerge muntazam surette yardımnıñ kösterilmemesi olarnıñ ayatı ve sağlığı içün ciddiy bir telükedir. İşğalci akimiyetniñ böyle areketleri yalıñız Qırımda de-facto icra etilmekte olğan Rusiye qanunlarına zıt kele degil, aynı zamanda temelli insan aqlarını da bozalar», – denile.
Aq-uquq qoruyıcıları, Qırımdaki azatlıqtan marum etüv yerlerinde muntazam surette tıbbiy yardımnıñ kösterilmemesi ve insaniyetsiz şaraitler mabüslerge bedeniy azap bere ve ölümlerine ketirmek mümkünler, dep qayd eteler.
Qırım aq-uquq qoruyıcı grubu, Rusiye akimiyeti «eziyetlev, insaniyetsiz munasebet kösterüv ve olarğa musaviy dep qabul etilgen qastlı olaraq tıbbiy yardımnı köstermeme tecribelerini deral toqtatmaq» borclu, dep qayd ete.
Dekabrniñ 14-nde «Veciye Kaşka işi» figurantları Bekir Degermenci ve Asan Çapuhnıñ advokatları, imayeleri altında bulunğanlarğa tıbbiy yardımnıñ berilmesini temin etmegen muvaqqat izolâtornıñ hadimlerine qarşı Kremlniñ kontroli altında bulunğan Qırım prokuraturasına şikâyet ettiler.
Bekir Degermenci dekabrniñ 14-ne keçer gecesinden başlap, pek ağır vaziyette reanimatsiya bölüginde buluna.
