Noyabrniñ 23-nde Aqmescitte tevqif etilgen qırımtatar milliy areketiniñ faaliyetçisi Bekir Degermenci dekabr 14-niñ gecesinden berli pek ağır vaziyette reanimatsiya bölüginde buluna. Bunı Qırım.Aqiqatqa Qırım advokatı Edem Semedlâyev söyledi.
Advokat: «O, ilâclar tesirindeki tıbbiy yuquda buluna, aqcigeri suniy şekilde avalandırıla, qan basımı ilâclar yardımınen regulirlene, olarsız basım pek sekirikley. Özüni köralmadım. Saba ömür arqadaşı keldi. Oña oğramağa daa tırışacaqmız. O, endi sekiz yıldan ziyade bronhial astma boyunca üçünci grup saqattır. Bes-belli stress, (muvaqqat izolâtordaki – QA) şaraitler ve mahsus azırlıqsız yapılğan yardım bu vaziyetke ketirdiler», – dedi.
Dekabrniñ 14-ne keçer gecesinde Bekir Degermenciniñ reanimatsiyağa oğrağanı belli oldı.
Noyabrniñ 23-nde kündüz ilhaq etilgen Aqmescitte telükesizlik hadimleri bir grup qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar. Rusiye FSBsiniñ Qırım boyunca idaresi yaqalanğan faaliyetçilerni Türkiye vatandaşından «aqsız yerde hususan büyük miqdarda para talap etüv»de qabaatlay.
Qırımtatar faaliyetçileriniñ yaqalanuvı esnasında qırımtatar milliy areketiniñ veteranı Veciye Kaşka yaramadı. Adise yüz köstergen yerinden onı «acele yardım» alıp ketti. Daa soñra qadınnıñ vefat etkeni belli oldı.
Noyabrniñ 24-nde Rusiyeniñ kontroli altında bulunğan Aqmescitteki Kyiv rayonı mahkemesi yaqalanğan qırımtatar faaliyetçilerini 2018 senesi yanvarniñ 15-ne qadar apiste qaldırdı.
Dekabrniñ 6-nda Qırım Yuqarı mahkemesi, Degermenciniñ muvaqqat izolâtorda apis etilüvi boyunca qararnı deñiştirmeyip qaldırdı.
Rusiye tarafından ilhaqından soñ Qırımda mustaqil jurnalistler, cemiyet faaliyetçileri, qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtına alâqası bar dep şübhe altında tutulğan Qırım musulmanlarınıñ evlerinde ketken sayın daa sıq surette tintüvler yapıla.
