Qırım.Aqiqat muhbiri, 2014 senesi fevralniñ 26-sında Qırım Yuqarı Radasınıñ binası ögünde yapılğan Ukrainanıñ topraq bütünligine qol tutuv mitingi boyunca «iş»niñ figurantlarından biri olğan Eskender Emirvaliyevniñ, Kremlniñ kontroli altında bulunğan Aqmescitteki Merkeziy rayon mahkemesi tarafından sorğulanğanını bildire.
Emirvaliyev, miting aqqında KHVden bilip, oña öz isteginen kelgenini söyledi. O, iç kimseden talimat almayıp, bu yolnen «qanuniy tarzda öz fikrini ifade etmek ve Ukrainanıñ topraq bütünligine qol tutmaq» istegenini qayd etti.
Mitingniñ ötkerilmesi esnasında «iş»niñ figurantı yalıñız yaşağan qasabasında qomşusı olğan Mustafa Degermencinen tanış edi. Qırımtatar Milliy Meclisine iç bir alâqası yoq.
Emirvaliyev, mitingge kelir kelmez, «iş» boyunca zarar körgen Andrey Şlâgin ile aralarında öz-özünden turmuş çatışmasınıñ başlağanını tasdiqlap, çatışmanıñ tafsilâtlarını hatırlamağanını söyledi.
Onıñ aytqanına köre, o, özüne ve diger muhakeme etilgenlerge qarşı ifadelerini, oña mahkeme tarafından tayin etilgen advokatnıñ tazyıqı altında berdi.
Emirvaliyev mahkemede: «Advokat hanım, tahqiqatçınıñ bütün aytqanları ile razılaşıp, menim vaziyetimni daa beter alğa ketirmekten başqa bir şey yapmadı. O maña: «Videoda özüñni köresiñmi? İşte bunı qabul et, er şey yahşı olur», dey edi», – dep bildirdi.
Buña baqmadan prokuror, ifadelerinde «muim zıddiyetler» olğanına sıltap, tahqiqatçı tarafından Emirveliyevniñ sorğulanması protokolınıñ ilân etilmesini tiledi. İşniñ beş figurantı ve advokatları, bu, Rusiyeniñ Cinaiy-protsessual kodeksi 75-nci maddesiniñ açıq bir bozuluvı olğanına diqqatnı celp etip, bir ağızdan buña qarşı çıqtılar.
Akem, qabatlayıcı tarafınıñ tilegini tasdiq etip, yazılı ifadelerni oqudı.
Dekabrniñ 12-sinde Aqmescitte mahkeme, «iş»niñ daa bir figurantı olğan Eskender Kantemirovnı ve dekabrniñ 14-nde Arsen Yunusovnı sorğuladı.
2015 senesinde bir grup qırımtatar faaliyetçilerge qarşı 2014 senesi fevralniñ 26-sında Qırım Yuqarı Radası binasınıñ divarları yanında Ukrainanıñ topraq bütünligine qol tutmaq maqsadınen yapılğan mitingde iştirak etkenleri içün mahkeme başlandı. Olarnı kütleviy qarışıqlıqlarda iştirak etkenlerinde qabaatlaylar.
Daa soñra mahkeme «Fevral 26 işi»ni ekige ayırdı: qırımtatar milliy areketiniñ liderlerinden biri Ahtem Çiygoznıñ işi, davanıñ diger figurantları olğan Ali Asanov, Mustafa Degermenci, Eskender Kantemirov, Talât Yunusov, Eskender Emirvaliyev, Arsen Yunusov ve Eskender Nabiyevniñ işinden ayırıldı.
Rusiye akimiyeti oktâbrniñ 25-nde Qırımda mahküm etilgen Qırımtatar Milliy Meclisi reisiniñ muavinleri Ahtem Çiygoz ve İlmi Umerovnı azat etip, Türkiyege teslim etti. Daa soñra Umeriv ve Çiygoz Kyivge keldiler.
